El micromecenalgu de la novela ‘Baxo’l pumar’ entra na so recta final

|
'Baxo'l pumar' de Marga Pedrayes reducida

Marga Pedrayes va asoleyar la so segunda novela, la primera n’asturianu, ‘Baxo’l pumar’, que va editar Cuatro Gotes. La escritora xixonesa tien en marcha una campaña de micromecenalgu na rede pa financiala, con delles recompenses pa los participantes, qu’encara lo sos díes últimos mui cerca d'algamar l'oxetivu marcáu..

De temática venceyada a la sidra, el llibru cuenta la historia de Colás, “un home del sieglu XIX, el so peculiar ñacimientu y la so obsesión por facer la so propia sidra”, espliquen dende la editorial. D’esta forma, Pedrayes quería retratar la evolución d’un pequeñu llagar familiar a lo llargu d’un sieglu y mediu “pero las narraciones tienen vida propia y ésta se convirtió na historia del so primer protagonista, Colás, y la so obsesión por una pumarada”, apunta Pedrayes, que presentó la novela a concursu nel XXXVII Premiu Xosefa Xovellanos, correspondiente al 2016, que ganó ‘El valor del rei’ de Xulio Arbesú.

L’oxetivu de la campaña de micromecenalgu en Verkami yera recaudar la metá del gastu d’edición del llibru, presupuestáu en 2.500 euros, de les que yá algamó 1.900 a falta de 3 díes pa que se pieslle. Como reclamu, Pedrayes ufre amás de la preventa de ‘Baxo’l pumar’, tantu en formatu físicu como dixital, y recompenses como marcapáxines d’encaxe feches por ella mesma o zapiques.

La obra va asoleyase’l mes próximu y tolos mecenes van tener espaciu na páxina d’agradecimientos prevista. Ye la primera novela asoleyada n’asturianu por Pedrayes, que nel 2012 editara ‘Marca vikinga’, d’ambientación histórica.

Contador Estadistiques