El mediu ambiente asturianu, énte la fecha del 5 de xunu

Esti domingu 5 de xunu celébrase'l Día Mundial del Mediu Ambiente, una fecha énte la que colectivos como la Coordinadora Ecoloxista d'Asturies quieren aprovechar pa llamar l'atención sobre la política ambiental del Gobiernu asturianu. Contra les "declaraciones institucionales bienintencionaes" el grupu ecoloxista sorraya qu'esti Gobiernu ye'l promotor de grandes proyectos d'impactu ambiental na nuestra Comunidá, llegando a convertise al paecer de la Coordinadora l'executivu asturianu nel mayor enemigu del mediu ambiente asturianu.


Como ye vezu, la coordinadora Ecoloxista apurre un llistáu de les mayores agresiones al mediu ambiente protagonizaes pol executivu autonómicu, ente les qu'apaez en primer llugar la degradación de los hábitat de la Cordillera Cantábrica. La estación d'esquí "Fuentes de Invierno" en Puirtu Braña, el proyectu de la variante de Muñigu nos Picos d'Europa, el proyectu d'abellugu de monte nel Meicín, que la Coordinadora nun dulda en calificar de "hotelín", el recrecío de les mines de Degaña y el túnel de Rañadoiru apaecen ente los principales puntos d'actuación nesti sentíu. La Coordinadora remembra que toes estes actuaciones lleven arreyaes alteraciones d'importancia en llugares de gran valor, repercutiendo sobre'l paisaxe y la biodiversidá, dañando a especies en peligru d'estinción como l'osu.

La mala planificación de los recursos hídricos asturianos sedría un segundu puntu d'atención, sobremanera no tocante a la construcción d'embalses ente los que rescampla'l de Caliao, anque tampoco ye l'únicu, esistiendo otru importante proyectu pa la cuenca del Ayer. Los conservacionistes asturianos llamen a que se dexe'l procesu de canalización de los ríos asturianos, que namás lleva a la perda de los habitat de les sos orielles y a que se faiga un aprovechamientu más racional del agua

El Plan d'Ordenación del Litoral (POLA) acabante d'aprebase, tampoco nun queda llibre de condena ecoloxista. Según la Coordinadora, y contra les llectures que defenden el POLA como un preséu pa la protección de la costa, el documentu ye un sofitu a la progresiva urbanización del litoral, con proyectos de caminos peoniles pela costa complementaos con aparcaderos y árees d'espardimientu que puen contribuyir a la desnaturalización d'un espaciu yá afectáu polos planes urbanísticos de munchos conceyos que busquen más la defensa d'intereses especulativos qu'un desarrollo racional del territoriu. Les urbanizaciones de La Talá en Llanes, Ouviñana en Cuideiru o Verdiciu en Gozon sedríen dellos exemplos d'esti apertón urbanísticu sobre la costa. La mala conservación de los caladeros de pesca, dañaos poles redes d'arrastre, y otros proyectos públicos como'l del superpuertu de Xixón pondríen otru clavu más na caxa de la costa asturiana al paecer de la Coordinadora.

Los ecoloxistes llamenten la falta d'una ordenación sostenible del sector forestal énte l'espoxigue d'especies foriates como l'ocalitu, mientres que denuncien la permisividá cola minería n'abertal y les canteres, axentes que tan dañando los montes del país.

No tocante a contaminación atmosférica d'aniciu industrial, los ecoloxistes defenden qu'esta sigue siendo un problema n'Asturies, onde carecemos d'una absoluta falta de control sobre les emisiones, esistiendo en dellos puntos de la nuestra xeografía "valores preocupantes" en delles sustancies, una situación que, ente la creación de más centrales térmiques y el caltenimientu de les qu'esisten "solo pue dir a peor"

El durísimu informe de la coordinadora Ecoloxista sobre l'estáu del Mediu Ambiente n'Asturies fala d'un puntu poco conocíu como ye'l de la contaminación del suelu. Les escombreres ensin control, la basa contaminao procedent d'actividaes industriales son pa la Coordinadora una herencia prieta pa xeneraciones futures, lo mesmo que les carencies de los sistemes de saneamientu de les agües residuales. La Coordinadora urxe a que nun se tresllade'l problema vertiendo a la mar y a que se pongan en funcionamientu depuradores qu'anguaño "tan inoperatives".


Lo que s'aplica a los residuos líquidos valdría tamién pa los sólidos, y asina denúnciase que'l númberu de contenedores pa reciclao ta menguando "por absurdes razones estétiques" mientres, según diz la coordinadora, prepárase dende la Conseyería una propuesta d'incineración de residuos.


Los campos electromagnéticos, col crecimientu de les redes d'alta tensión y l'espoxigue de la telefonía móvil son otru puntu nel que la coordinadora diz que se ta actuando de manera mui agresiva contra la salú de los ciudadanos, neto que nun esiste una ordenación sobre'l problema del ruiu.

Les polítiques d'ordenación urbana apaecen tamién nel informe "verde" que diz qu'Asturies ta trabayando nesti sentíu ensin una planificación a llargu plazu y ensin criterios de sosteniblidá, resintiéndose d'ello la calidad de vida nes ciudaes, sobremanera no trocante a la ordenación del tráficu nes grandes árees urbanes asturianes.

N'últimu llugar, la Coordinadora esixe un compromisu cola información y la educación ambiental, y denuncia qu'Asturies ye una de les comunidaes autónomes españoles que menos recursos-y dedica a esta educación, pa concluyir como resume de tol so informe que "l'alministración asturiana, poles carencies na so política ambiental y pola combayonería que demuestra con delles actuaciones, ta convirtiéndose nun factor más de deterioru del mediu".