El Marino, únicu equipu asturianu en 2ªB

L'equipu lluanquín va ser la temporada qu'entra l'únicu representante asturianu na Segunda B y conviértese asina por categoría deportiva nel segundu equipu del fútbol asturianu tres del Sporting de Xixón al nun pasar el Real Uviéu la eliminatoria d'ascensu col Arteixo gallegu.

El Marino de Lluanco empató nel descuentu con un gol de Robert col Pegaso madrileñu, ún equipu al que los asturianos nun ganaren en casa (0-0). El resultáu final d'empate a 2 en campu del Pegaso val-yos el pase a los asturianos pol valor doble de los goles fuera de casa.

El Marino salva la vergoña del fútbol asturianu dempués de que l'Uviéu, ún de los históricos del fútbol asturianu, s'estrapallare cola dura realidá al perder la eliminatoria col Arteixo precisamente pol efectu contable de los goles fuera de casa. Dempués de perder pola mínima en campu del Arteixo, l'afición carbayona contaba con que l'efectu de xugar nel Tartiere fuere abondo pa pasar penriba del conxuntu coruñés, pero'l marcador final de 3-2 nun foi abondo, ello dempués d'un partíu emocionantísimu en que los gallegos llegaron a dir ganando hasta la reacción final del Uviéu, que quedó curtia.

Estos resultaos convierten al Marino nel segundu equipu nel ranking del fútbol asturianu y únicu representante del país na 2ªB tres de los descensos catastróficos del Avilés y el Caudal, que yá yeren carne de tercera cola temporada amediada. Mal añu pal fútbol asturianu en xeneral, qu'aspiraba a ver al Sporting en primera y contaba con xubir más equipos a segunda B.