El Marino recupera plaza en Segunda División B cuatro años depués

Los de Lluanco pudieron col Sestao River y la presión de Las Llanas. El Lealtad, mentes, nun pudo rematar la so meyor temporada col ascensu pol valor dobles de los goles fuera.

Cara y cruz pa los equipos asturianos na eliminatoria decisiva pa xubir a Segunda División B. El Marino despachó'l sábadu un gran partíu que s'allargó con prórroga, pero supo materializar un tantu a falta de 4 minutos, mentes que'l campeón asturianu, el Lealtad, sumó la tercer derrota de la temporada, les trés nesta fase pol cambiu de categoría, y tendrá que permanecer un añu más en Tercera.

Tres cuatro temporaes en Tercera y trés fases d'ascensu fracasaes, el conxuntu gozoniegu recuperó la que venía siendo la so categoría habitual nesti sieglu. Foi gracies a un gol de pizarra d'Emilio Morilla al rematar de cabeza un serviciu, tamién cola tiesta, de Trabanco tres una falta sacada al segundu palu por Álex Arias.

El 0-1 fixo españar la llocura na zona del llateral d'un abarrotáu Las Llanas onde taba'l mediu millar de siguidores del Marino. Asina, l'equipu entrenáu por Oli firmaba una fase d'ascensu inmaculada, onde nun recibió nengún gol nos seis alcuentros disputaos col San Ignacio, el Mutilvera y el Sestao River.

Golpe duru en Les Caleyes

El xugador visitante Nacho Huertas lideró al Villarrobledo ayeri en Les Caleyes, que con su victoria por 1-2 arrebató al Lealtad l'ascensu a Segunda B pol valor doble de los goles fuera de casa (2-2 nel goblal). El toledano firmó dos goles de gran execución, axustando los disparos al palu, ensin posibilidá pa Javi Porrón pese a les sos estiraes, amosando que ye un futbolista de categoría superior.

El gol de Saha nel minutu 62 ilusionó a Villaviciosa cola remontada y los de Samuel apretaron hasta'l final a pesar de quedar con 10 siete minutos depués que Pedrayes recibiera la collorada direuta al garrar a un rival cuando yera'l defensa últimu y ésti encaraba portería. Ésti nun llegó, a pesar d'un posible penalti nel 95 a Juan Cueto que'l colexáu nun s'atrevió a señalar, y el Lealtad, que finara la campaña regular ensin conocer la derrota, queda ensin l'esperáu ascensu col Getafe B y el Villarrobledo como verdugos.

El Lenense torna a Tercera

L'ascensu del Marino dexa una plaza en Tercera, que va cubrir el cuartu clasificáu de preferente, el Lenense. Otru equipu gozoniegu vese beneficiáu pol trunfu de los de Lluanco, el Podes, qu'ocupa la del equipu ḷḷenizu.

Mentes, l'Estudiantes, de Somió, pasa a competir en primera autonómica. L'Avilés Stadium, pendiente d'un segundu ascensu asturianu pa dar el saltu a Tercera, nun pudo cambiar la categoría, al igual que'l Luarca CF y el Siero B.

Na imaxe, un momentu del partíu ente'l Sestao River y el Marino en Las Llanas. Semeya propiedá del Club Marino.