El Marino consigue l’ascensu a Segunda División B, categoría que pierde’l Caudal na prórroga

El Marino consiguió’l cuartu ascensu de la so historia a Segunda B División B tres superar al Costa Cálida por 3-0 (2-2 na ida). Mentes, el Caudal forzó la prórroga contra’l Conquense, pero un gol de Belencoso sentenció la eliminatoria (2-1; 2-0 na ida).
 
Dos temporaes tuvo nesta etapa’l Club Marino de Lluanco na Tercera División. Tres la intentona del añu pasáu baxo les riendes de Rogelio García, agora téunicu de cantera del Sporting, José Luis Quirós tornó al banquillu de Miramar pa tratar de recuperar, per segunda vez na so carrera, la categoría que l’equipu perdió na temporada 2008-2009, tamién con él como entrenador. La trayeutoria del club na lliga regular foi mui bona y los marinistes acabáronla como primeros, coles facilidaes qu’ello supón p’algamar l’ascensu baxo’l formatu nuevu.
 
El rival nel sortéu foi’l Costa Cálida murcianu, club con poca historia pero que nun prometía ser un rival fácil. Los de Quirós consiguieron amarrar un empate a dos goles nel partíu d’ida, un bon resultáu que permitió a los futbolistes lluanquinos xugar con tranquilidá en Miramar pa ganar por un contundente 3-0. Los goleadores del conxuntu marinista foron Sergio Villanueva, Sergio Prendes y Titi. Agora, tres la celebración, el Marino principia a pensar na próxima temporada na que tovía ta nel aire la continuidá de Quirós, que ta meditando siguir pola esixencia d’una categoría como la Segunda B, onde los de Gozón van acompañar al Uviéu.
 
Y mentes l’allegría invadía Lluanco’l sábadu, Mieres nun pudo celebrar nada’l domingu pese a tar a punto de llograr la remontada ante’l Conquese nel play-off pola permanencia en Segunda B. El 2-0 de la ida nun mal partíu de los de Paco pesó muncho na eliminatoria y un gol de Belencoso a falta de seis minutos pal final de la prórroga dio la categoría a los de Cuenca cuando too paecía que diba a decidise nos penaltis.
 
Un gran gol de Carlos Álvarez nel 85 y otru de José Luis nel tiempu añadíu permitieron a los mierenses forzar una prórroga que caulisquier aficionáu del Caudal firmara enantes del partíu. Sicasí, les fuercies taben yá mui xustes y, pese a apretar, una contra mató a los de Paco que tornen a Tercera División tres firmar una bona temporada nun grupu complicáu de la Segunda División B.
 
Nesta xornada tamién confirmóse’l descensu del Xixón Industrial a Preferente, yá que la perda de categoría del Caudal y el Sporting B, xunía al fracasu de los otros tres equipos asturianos de Tercera clasificaos pa la fase d’ascensu, namái permitió salvar los muebles al Nalón, que consigue asina la primer permanencia de la so historia en Tercera División. Otru equipu perxudicaú foi la Piloñesa, que vese arrastráu a Primera Autonómica pel mesmu motivu que l’Indus.
 
Los resultaos del resto de clubes asturianos que xugaron la fase d’ascenso foron: Universidá d’Uviéu-Reus, 2-2 (1-1 na ida); La Roda-Llangréu, 2-0 (0-0 na ida); y Las Palmas Atlético-Tiuya, 2-0 (0-2 na ida).