El maremotu asiáticu nun afectó les cotizaciones

Los inversores españoles pesllaron un añu mui positivu asitiando'l parqué madrilanu como un de los más rentables del añu 2004. L'Ibex-35 medró más d'un 17% pesllando los más de los valores con abultaes ganancies. Nos mercaos internacionales el pieslle foi tamién positivo anque tuvo que facer frente a les xubes de tipos de la Reserva Federal, a los probetayos datos macroeconómicos de los Estaos Xuníos, a l'ablucante xuba del preciu del petroleu y a la inestabilidá xeopolitico mundial sobremanera pola situación d'Oriente Mediu.

La catástrofe del maremotu d'Asia nun afectó a los mercaos. De toles maneres les consecuencies puen ser dramátiques tamién pa la economía yá que les más de 150.000 muertes, les zones arrasaes y los más de 5 millones de persones nel blancu de les enfermedaes y la fame puen poner en crisis a los países asiáticos. Mentanto los países ricos ya tan poniendo a furrular les ferramientes más afayaíces pa facer llegar a les zones afeutaes medios técnicos, perres, melicines y alimentos. Les donaciones tanto públiques como particulares superen ya 1 billón de dólares. El turismu y les industries como la testil van ser los más dañaos a curtiu plazu.

Wall Street peslló l'añu 2004 en positivo con un índiz Dow Jones asitiáu nos 10.800,30 puntos y con un Nasdaq qu'algamó los 2.178,34 puntos. El sector tecnolóxicu foi ún de los más beneficiaos. Nel Vieyu Continente les bolses de Francfort, París y Londres trancaron con ganancies añales de cerca del 7,5%.

Raspiando los 9.100 puntos foi'l resultáu d'un esitosu añu pal selectivu Ibex-35. Con un volume de 2.273 millones d'euros la Bolsa de Madrid tuvo un añu bien interesante con un entamu del 2004 con xubes, con un veranu mui a la baxa y con una xuba llibre nos meses de payares y avientu. La selmana pasada los valores con más ganancies foron Telefónica, Telecinco, Sacyr Vallehermoso, Arcelor, Enagás y Amadeus. Nel terrén de les cayíes destacaron Zeltia, Rede Eléctrica, Ercros y Avanzit. El meyor valor del Ibex nel añu 2004 foi TPI mentanto que'l peor valor foi la gallega Zeltia.

Ensin duldes l'añu 2004 foi l'añu del euru en cuanto superó la cotización del dólar. L'euru algamó una cotización penriba los 1,36 dólares unidá. El casu ye que'l dólar tuvo un añu permalu onde tuvo perdes respective a delles monedes amás del euru, como la llibra esterlina y el yen xaponés.

El preciu del petroleu sigue asitiáu penriba los 40 dólares el barril. Con una xuba del 34% a lo llargo del añu 2004 el petroleu ye un de los factores que puen frenar agora mesmo la marcha de la economía mundial. Otramiente, el metal mariello yá val 438 dólares onza con una rentabilidá añal penriba'l 5,5%.