El ‘Manual de llinguaxe alministrativu en llingua asturiana’ va pa imprenta

El grupu de trabayu pa la ellaboración del ‘Manual de llinguaxe alministrativu en llingua asturiana’, impulsáu pol Gobiernu pa facilitar l’usu del asturianu na Alministración pública, yá remató’l so trabayu de redaición. El siguiente pasu ye la so edición en papel –tamién va tener versión dixital– pa ponelu a disposición de toles alministraciones.

Esta mañana celebróse la última xunta de trabayu del grupu encargáu pol Executivu pa la ellaboración del ‘Manual de llinguaxe alministrativu en llingua asturiana’, a la qu’acudió les conseyeres de Cultura, Política Llingüística y Turismu, Berta Piñán, y Facienda, Ana Cárcaba, amás d’Antón García, direutor xeneral de Política Llingüística. Ésti tuvo conformáu por Juncal García Velasco, xefa del Serviciu de Conocimientu; Sara Palacios Fernández, xefa del Serviciu de Normalización, y los filólogos Luis Casteleiro y Xosé Miguel Suárez, toos ellos de la Direición Xeneral de Política Llingüística, mentes que per parte del Institutu Asturianu d’Alministración Pública Adolfo Posada (IAAP), participó la coordinadora de Formación en Llinia y de Llingües, Consuelo Vega.

Completaron el mesmu la téunica normalizadora Penélope Miranda, en representación de la Rede de Normalización Llingüística; el profesor Ramón d'Andrés, de la Universidá d'Uviéu; el coordinador de Xestión Documental y Alministración Dixital na Direición Xeneral de Función Pública, Carlos Carrero; y l’abogáu Nicolás Bartolomé, pola Academia de la Llingua Asturiana. “La ellaboración d’esti testu de referencia constituye la primer iniciativa puesta en marcha nel Principáu pa dotar d’una ferramienta de normalización léxica y llingüística a les alministraciones autonómica y local, a disposición de les persones que davezu trabayen nelles”, apunta’l Gobiernu, que rescampla que la puesta en marcha del grupu de trabayu nun representó nengún costu estraordinariu pa l’Alministración.

A lo llargo de tol cursu, el grupu de trabayu estableció les tipoloxíes documentales que más davezu usa l’alministración pa ufiertar darréu modelos n’asturianu d’esos documentos. El manual incorpora tanto documentos de l’Alministración autonómica (diferentes formularios, fiches d'acreedor, requerimientos, resoluciones, declaraciones responsables, anuncios, bases reguladores...), como de la llocal (certificaciones, solicitúes, fueyes de reclamación, llicencies, actes...).

El manual ‘Manual de llinguaxe alministrativu en llingua asturiana’ va editase en formatu billingüe y va contar con anexos con abreviatures, un llistáu de normativa y un glosariu de terminoloxía alministrativa.