El 'Manifiestu de la Otra Xente' reclama "poner fin a la guerra contra la naturaleza"

Promovíu pol escritor Manuel Rivas y el naturalista Antonio Sandoval, y robláu por un centenar de persones de dellos ámbitos, espublizóse en toles llingües del Estáu.

"Vivimos un tiempu d’emerxencia planetaria. Hai que poner fin a la guerra contra la naturaleza. Poner fin a los procesos de desaniciu. Acabar colos asesinatos ecolóxicos en masa contra la Otra Xente. Tenemos qu’establecer un nuevu contratu cola naturaleza, un contratu de reconciliación", arranca'l 'Manifiestu de la Otra Xente', un documentu que s'entamó a mover a lo último del añu pasáu en defensa de los que nun tienen voz.

En dellos idiomes, ente ellos l'asturianu –hai versión tamién na variante occidental, presentada como 'llionés'–, nun tardó en difundise y en sumar apoyos, sobre manera nel mundu científicu y cultural. Ernesto Díaz, naturalista coordinador de la Plataforma para la Defensa de la Cordillera Cantábrica, encargóse de promover la traducción al nuesu idioma.

El manifiestu sigue asina:

"Ye hora de descolonizar y desesclavizar la nuesa mente. El respetu a la Otra Xente, a la naturaleza, ye tamién la nuesa empancipación. Ensin la biodiversidá nun va haber llugar pal ser humanu na Tierra.

Frente al fanatismu de la sobresplotación ilimitada tenemos qu’abrir pasu a un decrecimientu, entendíu como una nueva bayura. Bayura nel bienestar de y cola naturaleza. Tenemos que renaturalizanos pa reacontranos cola madre tierra.

Llegó’l momentu de pensar n’ampliar los derechos de la otra xente y estender de manera univeral lleis que la defendan frente a toa forma d’ecocidiu.

Hai qu’actuar. El primer pasu, la primer revolución, ye entamar a escuchar les voces de la Otra Xente".