El Mérida AD, rival del UP Langreo na eliminatoria definitiva pol ascensu a Segunda División B

El Llangréu podría celebrar l’ascensu a Segunda División B en Ganzábal si ye quien a superar al Mérida Asociación Deportiva, rival que-y tocó nel sortéu del llunes. En Segunda A, el Sporting viaxa a Las Palmas pa xugar el primer choque del play-off.

 

El camín pa los llangreanos nun va ser fácil, yá que’l Mérida AD, equipu fundáu hai añu y mediu que compitió en Tercera División tres alquirir los derechos deportivos del Mérida Unión Deportiva, busca siguir los pasos del tamién desapaecíu Club Polideportivo Mérida, aquella entidá que xugara mientres dos temporaes en Primera División na década de los 90. De fechu, disputa los sos partíos nel mesmu campu, el Romano –anteriormente conocíu como ‘Romano José Fouto’ n’homanaxe al presidente que llevó al equipu a la categoría máxima del fútbol estatal–, que vivió’l domingu una entrada de 10.000 espectadores nel partíu decisivu col navarru San Juan, que finó con empate a un gol gracies a un tanto nel 90 del central Mansilla qu'evitaba la prórroga (el resultáu n’Iruña foi de 0-1). Enantes eliminara al Real Ávila por un global de 3-0 (0-1 y 2-0).

 

Entrenaos por Bernardo Plaza, los emeritenses finaron la lliga regular en segunda posición tres el Villanovense –equipu qu’algamó l’ascensu tres goliar a la Gimnástica– y conformen un bloque sólidu que ta consiguiendo movilizar a l’afición llocal. Sicasí, la bona imaxe que ta dando’l Llangréu nesta fase d’ascensu da motivos pa la esperanza, con victoria fácil frente al Atlético Monzón y remontada en Ganzábal col Haro. El partíu d’ida va disputase a les 18 hores del domingu con precios de 3 euros en fondos, 5 en preferencia y 8 en tribuna. Pa esti choque Pablo Lago va contar con dos baxes significatives por sanción, les de Mendi y Nacho Calvillo.

 

El Sporting yá ta en Canarias

 

Abelardo convocó a 19 futbolistes pal desplazamientu a Las Palmas con vistes al primer partíu de les eliminatories pol ascensu a Primera División de mañana (21 hores, hora insular), quedando fuera por decisión téunica Mendy y Casquero. Los xixoneses lleguen a esti momentu decisivu de la temporada nun bon momentu tres enganchar trés trunfos y dos empates dende que’l téunicu xixonés sustituyera al frente del bancu a José Ramón Sandoval, tolo contrario que los canarios. Sicasí, el potencial de la plantiya mariella obliga a xugar con concentración máxima nel Estadio de Gran Canaria.

 

Los xixoneses viaxaron a primer hora de la mañana a les islles con escala en Madrid y esta tarde van celebrar un entrenamientu nes instalaciones de Las Palmas en Barranco Seco. El Pitu va tener que facer un descarte pal partíu de mañana, que va arbitrar Daniel Ocón, del colexu de La Rioja. La vuelta va disputase’l domingu a les 19 hores, con entraes de 25 a 40 euros y suplementu obligatoriu p’abonaos de 10 euros. El ganador d’esta eliminatoria va enfrentase al vencedor de la que van disputar el Real Murcia y el Córdoba.