El ‘Lletres Asturianes’ dexa d’editase en papel

El númberu 122 de ‘Lletres Asturianes' y los siguientes van asoleyase namái en formatu dixital. El Boletín de l’Academia de la Llingua Asturiana, que dende’l 1999 cuenta con dos ediciones añales, nació nel 1982 espublizándose siempre en papel, cola posibilidá de consulta al traviés de la rede dende'l 2011.

La institución académica va dar esti pasu col primer númberu del ‘Lletres Asturianes’ del 2020 siguiendo les tendencies que se tán dando nestos tiempos de dixitalización, con una gran mayoría de la población con accesu a la rede al traviés de los sos dispositivos móviles o ordenadores, lo que permite un aforru de los costos d’impresión y una mayor difusión al llegar a persones de tol mundu. Nesi sen, tien la bona esperiencia de la revista ‘Ciencies. Cartafueyos Asturianos de Ciencia y Teunoloxía’, que nació nel 2011 namái en formatu dixital y que yá suma 9 númberos que se pueden consultar na web de la institución o na plataforma REUNIDO de la Universidá d’Uviéu.

La intención de l’Academia de la Llingua Asturiana ye la d’asoleyar el 122 enantes de que fine’l mes nestos mesmos llugares en llinia, con accesu llibre a tolos conteníos. El boletín va incluyir, como ye vezu, dellos artículos d’autores de dientro y fuera d’Asturies, les notes y anuncies de la institución, reseñes bibliográfiques y les últimes espublizaciones en llingua asturiana.