El llargu viaxe de la povisa asturiano

El 9 de setiembre del 2004, el "MV Ulla" un barcu con bandera de conveniencia fundió en Turquía carretando na so bodega más de 2.000 tonelaes de povisa contaminante procedente de les centrales térmiques asturianes de Ribera, Cangas y Lada.

Al dir a pique'l barcu, destapóse una historia kafkiana qu'asoleyó otra vuelta énte la opinión pública que casos como'l del Prestige nun son aisllaos y que'l petróleu nun ye l'únicu productu contaminante qu'anda al debalu pel mar en barcos ensin les condiciones mínimes de seguranza. Pero pa saber la historia del MV Ulla ye preciso recular hasta l'añu 1999, cuando'l MV Ulla, un barcu construyíu nel añu 1969, con bandera de Santa Lucía, San Vicente y Granadina, y en condiciones poco afechisques pa la navegación, salió del puertu d'Avilés con 3400 tonelaes de povisa de centrales térmiques con destín a Arxelia, ondela cementera Lafarge-Asland precisaba d'elles pal hormigón d'un embalse que taba faciendo Dragados ACS.

En llegando al so puertu de destín, la empresa destinataria refugó la entrada de la nave por tar la povisa moyao y polo tanto innútil, una situación énte la que lo lóxico sedría que'l barcu diere media vuelta. En cuenta d'ello, el MV Ulla marchó pa contra Turquía, anclando na rada del puertu d'Isdemir, onde llegó la nave a primeros del 2.000 con 1.400 tonelaes de menos na so bodega, una circunstancia que pudiere debese a la filtración a la mar de parte de la carga. En condiciones de deterioru cada vegada más aceleraes y col cascu picáu enteru de ferruñu, el MV Ulla sufrió una vía d'agua que lu echó a pique cuatro años y mediu dempués de llegar a Turuía. Foi entós cuando'l mundu entero supo de la esistencia d'esti barcu, que carretaba una povisa contaminao con Cromu Hexavalente, un metal pesáu que llevó a les autoridaes turques a prohibir la pesca y el bañu en 200 metros alredor del llugar au se perdiere la nave.

Agora, el Ministeriu de Mediu Ambiente d'España ta acabante d'autorizar la repatriación de los restos de la povisa almacenao en barcu, que ta sacándose del cascu fundíu a 40 metros baxo'l mar al traviés d'unes surnies pa llevalo darréu a una planta cementera de Sagunto. El Ministeriu de Mediu Ambiente, que mandó técnicos al llugar, diz que nun se lliberó al mediu acuáticu cantidá importante de cromu nin de nengún otru contaminante, anque xunta cola povisa asturiana va reciclase l'agua que tea dientro del cascu, pero dende la organización ecoloxista Greenpeace alvierten que de la carga que lleva'l barcu 3.800 kilos son de Cromu VI, al empar que faen un llamau a acabar colos que llamen "vertederos flotantes".