El Lealtad torna a Segunda División B quince años depués

Villaviciosa foi’l domingu una fiesta. El Club Deportivo Lealtad, que tuvo a piques de la desapaición hai dos años, consiguía tornar a Segunda B tres eliminar al potente Puertollano nos penaltis. Por contra, el Caudal pierde la categoría.

 

Javier Rozada consiguía l’ésitu de devolver a los maliayos a la categoría de bronce, na que compitieron namái una temporada, la 98-99 tres algamar l’ascensu de la manu de Marcelino García Toral, agora téunicu del Villarreal. Sicasí, l’héroe de la eliminatoria foi’l guardameta Javi Porrón al parar dos llanzamientos na tanda de penaltis. Enantes, nel minutu 43, Pablo Espina igualaba una eliminatoria que se complicaría poles espulsiones d’Edu García (doble mariella nel 73) y Piniella (nel 100), pero que’l Lealtad superaría col apoyu de les más de 1.000 persones qu’acudieron a Les Caleyes.

 

La noticia triste de la xornada foi’l descensu del Caudal tres perder 3-0 nel Cerro del Espino (4-0 nel global). Pese a firmar un final de temporada escelente tres la llegada de Tomé, evitando’l descensu direutu na xornada cabera, los mierenses nun dieron sensación de poder dar la vuelta a la eliminatoria énte l’Atlético B y acompañen a Tercera División al Algeciras, que tampoco nun pudo col otru filial del play-out, el Valencia Mestalla.

 

El Llagostera, rival de segunda ronda pol ascensu a Segunda A del Real Avilés

 

Geni, nel primer minutu, y Matías, nel caberu, permitieron al Avilés ganar na vuelta de la primer eliminatoria pol ascensu al Cartagena (5-1 nel global) y pasar de ronda, onde van vese les cares con un primeru, el Llagostera, que perdió’l so enfrentamientu col Real Racing Club de Santander al encaxar un gol n’El Sardinero. Los d’Uribe nun entren en sortéu al corresponde-y a los catalanes un cuartu o, nel so defeutu, un terceru –posición na qu’acabaron los blanquiazules–, siendo l’únicu cuartu (Nàstic) y l’otru terceru (Lleida Esportiu) del grupu 3. La ida va ser nel Suárez Puerta, probablemente’l domingu.

 

L’UP Langreo y l’UC Ceares esperen rival

 

Ganzábal y La Cruz vivieron ayeri tamién una xornada de celebración tres el pase del Langreo y el Ceares a la segunda ronda pol ascensu a Segunda B, y los sos aficionaos van tar pendientes esta tarde (16.30 hores) del sortéu que se celebra na sede de la Federación Española de Fútbol. Los de Pablo Lago nun tuvieron munchos problemas pa superar al Atlético Monzón con tantos de Manu Blanco y Campoy (en propia meta), pa colocar un 3-0 nel global. Mentes, nel barriu xixonés de Ciares, lo de Nacho Cabo, apoyaos por 1.300 persones, tiraron d’oficiu pa superar al Águilas FC con un gol de Pablo Martínez –que yá marcara’l 1-1 de la ida n’El Rubial– nel minutu 34 y continúen faciendo historia.