El jazz abellugase n'El Baruku

El local xixonés acueye mañana xueves 15 un conciertu
de jazz que va xuntar a dalgunos de los meyores músicos asturianos de
jazz, dalgunos convertíos en lleendes urbanes musicales.



Mañana xueves vamos poder asistir a un conciertu que nun se puede
ver tolos díes. Ello ye que van xuntase pa tocar varios músicos
que por distintes razones suelen tar separaos por milenta kilómetros, y
que namás dacuando son a reunise equí n'Asturies. Ocasión
qu'aprovechen por supuestu pa xuntase y facer jazz. Ente los nomes del
tríu que va tocar ta Horacio García col contrabaxu,
conocíu na escena folk por ser baxista de Tejedor y N'Arba, pero que
tamién desenvuelve una interesante carrera nel mundu del jazz,
formándose nestos momentos na escuela del xéneru de Donosti.
Xunta él va tar la guitarra de Carlos Pizarro, que vive agora mesmo n'
Amsterdam xunta una comunidá musical asturiana que tamién vive
ellí con xente como la cantante Mapi Quintana y el contrabaxista Dudu
Puente. El tríu piésllalu Alejandro Gallego, batería que,
esti sí vive n'Asturies, s'entiende perfectamente col restu d'esti
tríu tan bonu.



El conciertu va entamar a eso de les 21:30 hores n'El Baruku, que ta na
cai Almacenes de Xixón, y la entrada ye de baldre. Amás del
conciertu ye mui probable que la presencia de muncho músicos nel local
lleve a que la nueche acabe con jam session, y colo qu'a la fin vamos poder
disfrutar d'una nueche nel que'l jazz bonu va topar abellugu en Xixón,
n'El Baruku.