El III Nel Amaro ye pa ‘Les rellaciones peligroses’ de Factoría Norte

La compañía xixonesa Factoría Norte lleva’l III Premiu y Festival Nel Amaro de Teatru Profesional en Llingua Asturiana o Gallego-asturiano pola obra ‘Les rellaciones peligroses’. Asocede nesti gallardón a Carlos Alba ‘Cellero’ y a Higiénico Papel Teatro.

El xuráu encargáu de valorar les cuatro obres finalistes tuvo conformáu, baxo la presidencia del direutor xeneral de Política Llingüística, Antón García Fernández, pola actiz y crítica teatral Eva Vallines; la filóloga Esther Castro; la esritora Cristina Muñiz Martín; el secretariu de l'Academia de la Llingua Asturiana, Xosé Ramón Iglesias Cueva; y el direutor y críticu teatral, Roberto Corte. Por mayoría, decidió conceder el III Premiu Nel Amaro, con un recompensa 6.000 euros, a ‘Les rellaciones peligroses’ al valorar “el brillante exerciciu d'interpretación y l'axilidá y fluidez llingüística con que se desenvuelve una obra mui bien conxuntada qu'analiza en clave de comedia llixera la incomunicación que vive una sociedá tan interconectada”.

L’acta rescampla tamién la “enorme calidá de toles obres finalistes, lo que dificultó enforma la decisión”. Yeren 'Muyeres inesperaes', de Ververemos; 'Crecer', d’El Callejón del Gato; y ‘Una casa’, d’Higiénico Papel.

Escrita y dirixida pol Eladio de Pablo, ‘Les rellaciones peligroses’ trátase d'un cóctel esplosivu de drama, humor y pedagoxía sobre la manera que tien la mocedá d'encarar los peligros de les teunoloxíes nueves y les redes sociales, el so aniciu a la vida sexual y los prexuicios sobre la identidá de xéneru. Factoría Norte asocede nesti gallardón a Cellero, ganador de la primer edición con ‘Llázaro de Tormes’, y a Higiénico Papel, que lo fixo con ‘Hansel y Gretel’.