El III Día de les Ciencies Asturianes aporta’l miércoles a Xixón

La Conseyería de Cultura y Turismu del Principáu organiza’l miércoles 10 el III Día de les Ciencies Asturianes, con un programa d'actos que venceya'l saber científico y el so desendolcu en llingua asturiana, según informó'l Principáu.

Dao que la Organización de les Naciones Xuníes (ONU) declaró 2010 como l'Añu Internacional de la Biodiversidá (IYB) y que ye'l mediu marín el que cunta con un mayor númberu d'especies, el programa d’esti añu céntrase nel tema de la Biodiversidá Marina.
  
El diseñu del programa y el so desarrollu organizóse de manera conxunta ente la Dirección Xeneral de Política Llingüística y el Centru Oceanográficu de Xixón, dependiente del Institutu Español d'Oceanografía.
  
Los actos, que se van celebrar nel Salón d'Actos d'Acuariu de Xixón, van empecipiar a les 12.00 hores y van consistir en dos conferencies impartíes por especialistes internacionales de reconocíu prestixu, siguíes d'un coloquiu. L'actu va arrancar cola conferencia titulada “Esplorando la diversidá de lo invisible'.
  
Primera conferencia
Va impartila’l doctor Carles Pedrós-Alió, que va ser presentáu por Xosé Anxelu G. Morán, investigador del Centru Oceanográficu de Xixón. Carles Pedrós-Alió ye profesor d'investigación del Departamentu de Bioloxía Marina y Oceanografía del Institut de Ciències del Mar, CSIC, de Barcelona. Coordina'l Grupu d'Investigación n'Ecoloxía Microbiana Marina.
  
Ye representante d'España nel European Polar Board, miembru del comité asesor del International Census of Marine Microbes y del Scientific Committee for Antartic Research (SCAR) España. La so investigación busca entender la ecoloxía de lo más pequeñu: los microorganismos, tantu na mariña mediterránea como nes zones polares o'l desiertu d’Atacama.
 
Segunda conferencia
La segunda conferencia titúlase 'La vida nel océanu fondu: estraña, escondida, misteriosa'. La conferenciante va ser la Dra. Gritta Veit-Köhler, que la so presentación va correr a cargu del Director del Centru Oceanográficu de Xixón, el Doctor Javier Cristobo.
  
Veit-Köhler trabaya como investigadora nel Centru Alemán pa la Investigación en Biodiversidad Marina (Deutsches Zentrum für Marine Biodiversitätsforschung) de Wilhelmshaven. Les sos llínees d'investigación son la meiofauna nes rexones polares, la ecoloxía de la meiofauna y la taxonomía y bioxeografía de dellos copepoda (la meiofauna son pequeños invertebraos qu'habiten ente los granos de sable y nos fangos).
  
Amás, forma parte del proyectu CeDAMar -Censu de la Diversidá de la Vida Marina Abisal-, encargáu de la investigación de la fauna de les estenses planicies abisales, tema sobre'l que va impartir  la conferencia.