El hockey catalán queda n’orsai

La Federación Internacional de patinaxe celebraba estos díes en Fresno (EEUU) una xunta de la que tenía que salir la nueva composición del mundial "A" de la especialidá, al que los catalanes teníen ganáu l'accesu dempués de ganar el mundial "B" que se xugó va delles selmanes en Macáu. El tema yera polémicu en cuantes qu'almitir a Cataluña suponía dar un pasu mui grande nel reconocimientu de les selecciones deportives autonómiques, y en casu de pasar Cataluña al Mundial "A" de hockey tres d'ella podíen entamar a pingar nel duernu de les competiciones oficiales internacionales otres especialidaes deportives de Cataluña y d'otres autonomíes, que tendríen de xugar nos sos respectivos mundiales contra la selección Española.

La decisión de la Federación Internacional de Patinaxe d'aparcar pel momentu l'ingresu de Cataluña nel Mundial A nun sentó bien en Barcelona. El presidente del parlamentu catalán Ernest Benach declaró que "la inxerencia del Estáu Español nesti asuntu foi escandalosa" y que "con esti casu queda claro que nel mundu del deporte la política xuega un papel mui importante" pero dio anuncia de que'l casu "nun acaba equí". El presidente catalán Pasqual Maragall, que cuando Cataluña ganó'l mundial B declaraba que "si somos los meyores tenemos que tar nel mundial A" diz tamién que nun lo da too por perdío

La Federación catalana tien puestu un recursu contra la decisión, pero nun se cuenta con que salga alantre. Más información nel diariu catalán Vilaweb