El Gumial celebra'l so décimu aniversariu nel VII Alcuentru Folclóricu n'Ayer con un conciertu

|
Banda Gaites El Gumial

L'actuación especial de la banda de gaites complétase con una Nueche en Danza, el festival y la presencia de La Tarrancha. Morea acueye tamién estos díes un mercáu tradicional.

L'Alcuentru Folclóricu n'Ayer celebra una edición nueva, la sétima, que se convierte nuna mui especial por coincidir col décimu aniversariu de l'agrupación que lu entama, la Banda Gaites El Gumial. Por esti motivu, mañana, a les 23 hores, va ufrir a los presentes un repertoriu preparáu pa la ocasión.

L'actividá en Morea, sicasí, arranca güei a les 19 hores nel Centru Cultural cola presentación del llibru 'L'acompañamientu d'asturianada' de Santi Caleya y, a les 22.30 hores, cola I Nueche en Danza n'Ayer. Van llamar al baille la Bandina'l Busgosu, La Garrapiella y Pandereteres de Fitoria.

Al meudía de mañana va abrir el mercáu tradicional, y pela tarde va celebrase'l Festival de Bandes de Gaites a les 18.30 hores cola participación de la Banda Gaites Escolinos d'El Gumial, la Banda Gaites Fonte Fuécara, la Banda Gaitas Teixo Manolo Quirós y la berciana Banda de Gaitas Vega de Espinareda. Enantes, a les 17 hores, les cuatro formaciones van desfilar pela población.

L'esperáu conciertu décimu aniversariu d'El Gumial va concentrar al públicu a les 23 hores, pa finar la nueche cola actuación, dende les 00.30 hores, de La Tarrancha. Les bandines, mentes, van animar los chigres el domingu, cuando'l mercáu tradicional va recibir visitantes dende les 11 hores.

Na semeya, El Gumial el mes pasáu en Soto na Nueche Celta d'Ayer.

Contador Estadistiques