El grupu LLABOR afaya un túmulu megalíticu en Miranda de tipoloxía desconocida n’Asturies

Los trabayos desendolcaos pol grupu LLABOR d’investigación d’arqueoloxía agraria, de la Universidá d’Uviéu, nel xacimientu del Cuernu dexó un afayu esceicional. Atopóse “un túmulu megalíticu de tipoloxía desconocida n’Asturies y en tol noroccidente peninsular”, anunció la caderalga Margarita Fernández Mier.

La direutora de LLABOR apunta que dieron con ello al escavar “lo que paecía una pequena construcción ganadera” dientro d’una campaña pa completar la investigación sobro l'usu de les camperes de monte a lo llargo de la historia. La sorpresa foi dar con esti túmulu con tipoloxía diferente a “la que presenten los grandes megalitos atribuyíos al neolíticu final, polo que trabayamos cola hipótesis de que se trata d'una construcción rellacionada col Calcolítico y la Edá del Bronce, periodu pocu conocíu n'Asturies”, esplica.

La sepultura asítiase nel Cuernu, na parroquia de Vigaña, a 1.100 metros d'altitú, nuna posición estratéxica nel conceyu de Miranda. Dende ellí contrólase “l'amplia zona de camperes de les brañes de los pueblos de Vigaña, Castañera y Cigüedres, pero tamién se ve dende la mariña asturiana, al altor de Sotu'l Barcu, hasta les más altos cumes del Cordal Cantábricu, de Les Ubines al Nevadín”. Trátase, poro, “d’un llugar privilexáu, escoyíu polos nuesos antepasaos pa realizar unes práutiques rituales rellacionaes cola forma de concebir y aprovechar el territoriu que nos fala de les actividaes de los primeros ganaderos de los montes cantábricos".

A lo llargo de la campaña, codirixida pol arqueólogu Pablo López, pudiéronse documentar distintes fases d'usu y refaimientu del túmulu que presenta como particularidá la presencia de distintes cámares funeraries escavaes na roca, dalgunes d'elles a una fondura que llega a los dos metros, cuando lo habitual ye que sían construcciones sobre la superficie.

A 500 metros de Ḷḷinares

Mientres lo que queda d'agostu van allargase les intervenciones arqueolóxiques na zona coles mires de consiguir datar la estructura. El túmulu ta a unos 500 metros del xacimientu de Ḷḷinares, en Castañera, a 700 metros d’altitú, onde se pudo documentar una secuencia d'usu que s'empecipia nel neolíticu final, con fases bien complexes mientres la Edá del Bronce, lo que fai reforciar a LLABOR la hipótesis de que podría tar rellacionáu col Calcolíticu.

“La posibilidá de documentar los llugares d'usu domésticu xunto colos d'enterramientu mientres el Calcolíticu y la Edá del Bronce abre interesantes víes d'investigación sobro l'usu de les árees de campera mientres esti períodu y dexen afondar nes práctiques ganaderes desenvueltes coles sociedaes de la Prehistoria recién”, apunten dende’l grupu d’investigación d’arqueoloxía agraria. La intervención nel Cuernu completa los trabayos qu'a lo llargo de los postreros 13 años vien desenvolviéndose nesti llugar de Vigaña y en Ḷḷinares, escavaciones que dexaron trazar la historia d'una pequeáa comunidá dende'l primer momentu d'ocupación del territoriu, nel Neolíticu, hasta l'actualidá.