El Grupu de Teatru Colexu Públicu Felechosa avanza cola so xira

Tán representando per Asturies 'Torna al pasáu', obra cola que ganaron el VIII Certame de Teatru Escolar n'Asturianu y Gallego-asturiano.

Activu dende'l cursu 2012/2013, el Grupu de Teatru Colexu Públicu de Felechosa sumó 25 premios nos ocho certámenes d'esti concursu entamáu pola Conseyería d'Educación con motivu de la Selmana de les Lletres Asturianes, cinco d'elles esti añu. Trátase del de Meyor Obra, el de Meyor Actriz pa Catalina Revuelta pol so papel de 'Telvina', el de Meyor Escenografía, el de Meyor Direición y el de Meyor Testu, obra de Laura Prieto, maestra responsable de la compañía.

Esta comedia asitia al espectador nun futuru distópicu nel que’l mundu yá nun ye como lu conocemos por culpa de la nuesa mala xestión pa col planeta. Una obra que fai replantegar munches coses ensin dexar de llau l'humor y la retranca.

La xira de 'Torna al pasáu' principió en Mieres y yá contó con otra cita en Caborana y trés en Morea, dos pa les escolines y escolinos del conceyu d'Ayer. Los actores y actrices de Felechosa van poner el ramu a la mesma en casa, nel salón d'actos de la Residencia de la Minería del Montepío, el llunes 13 de xunu al meudía.