El grupu asturxaponés Fuxida actúa nel chigre L'Esperteyu

Fuxida, grupu d'orixe asturxaponés afincáu en New York, actúa esti xueves n'Uviéu en formatu dúu. Va ser a les 21.30 hores en L'Esperteyu.

El gaiteru y saxofonista uviedín Carlos Casado y el cantante y guitarrista xaponés Tatsuo Teraoka lideren Fuxida, banda conformada por cinco músicos orixinarios d'Asturies, Xapón y Catalunya que da como resultáu un amiestu orixinal y rompedor de folk, jazz, pop, rock y ritmos llatinos. Ente'l so repertoriu tán cantares tradicionales asturianos como 'Chalaneru', 'Carcarosa' o 'Santa Bárbara Bendita'.

Nel conciertu d'Uviéu, el segundu na ciudá tres una actuación improvisada'l vienres pasáu nel Llar La Llegra na celebración del Día de les Lletres Asturianes, Fuxida va contar cola collaboración de dellos miembros de la Banda de Gaitas Ciudad de Oviedo. La entrada ye llibre.