El Grupo Pachuca toma'l control del Uviéu

La sociedá mexicana queda col 51 por cientu de les aiciones y va xestionar el club, mentes que Carso guarda un 20 por cientu del capital social.

Asturies toma fuercia como feudu mexicanu nel fútbol européu. Dos selmanes depués de la merca del Sporting por Orlegi Sports, la propiedá del Uviéu, tamién norteamericana, decide dar una xiru de 180 graos a la xestión cola entrada del Grupo Pachuca na entidá como aicionista mayoritariu.

El Grupo Carso, que trabayara nel pasáu cola entidá inversora propietaria anguaño de trés equipos profesionales, dos en México, los Tuzos del Pachuca y el Club León, y otru en Chile, l'Everton de Viña del Mar, va quedar col 20 por cientu de les aiciones, pol 51 de Pachuca. Los pequeños aicionistes caltienen el 29 por cientu restante.

D'esta foma'l so presidente Jesús Martínez Patiño y el so equipu quedarán al frente de la xestión del club azul cola intención d'implantar una estructura más profesional que permita un crecimientu de la entidá. Esta cuestión yera una de les grandes crítiques de gran parte de l'afición carbayona a Carso, grupu que coles sos aportaciones consiguió saniar les cuentes de la sociedá.

A la espera del CDS

Una vegada fecha l'anuncia y comunicada al Conseyu Superior de Deportes (CSD), namái queda'l preste d'esti organismu pa oficializar la operación, de la que nun se conocen cantidaes económiques. D'esta forma pondráse fin a 10 años de xestión direuta del Grupo Carso nel Uviéu, tiempu nel que s'algamó un ascensu a Segunda y la consolidación nel fútbol profesional.