El Grupo Pachuca escueye Llatores pa la ciudá deportiva del Uviéu

El club yá zarró la merca de los terrenos.

Nuna selmana murnia pola perda del ex xugador Pelayo Novo, que siguía venceyáu a la entidá al traviés de la Fundación, l'Uviéu dio un gran pasu pal so futuru deportivu. El Grupo Pachuca decidióse finalmente polos praos vistos en Llatores pa la ciudá deportiva que sustituya a El Requexón y proyeuta una gran instalación asemeyada a la que llevantó en México pal Club León.

Esta mañana yá se punxo la primer piedra a la espera de conocer el proyeutu definitivu. Enterróse una caxa con un cachu de campu d'El Requexón, una camiseta del equipu, dos periódicos del día y un llibru donáu pol Conceyu sobre la historia de la ciudá.

Los terrenos, asitiaos cerca de La Pixarra y de les instalaciones Tensi, ocupen unes diez hectárees. La primer fase de les obres tendrán un plazu d'añu y mediu, y yá permitirá treslladar les oficines del club, anguaño nel Tartiere, y contar con polo menos dos campos disponibles.

Na imaxe, Carlos, embaxador del Uviéu, ayuda a dos neños a enterrar la caxa, col propietariu Jesús Martínez Patiño na parte superior derecha.