El Granada, rival duru pal Uviéu nel Tartiere na segunda ronda de Copa

El Sporting va viaxar a Soria la selmana del 21 d'avientu pa enfrentase al Numancia.

Había cuatro equipos de Segunda que debíen enfrentase ente sí nesta segunda eliminatoria de la Copa y el sortéu quixo qu'ún fora l'Uviéu y énte un rival d'entidá como'l Granada, descendíu recién de Primera División y con una plantía amplia p'afrontar esta competición. La nota positiva pa los azules ye que van xugar a partíu únicu en casa, un puntu a favor pa enfrentase a un conxuntu al que superaba na xornada última de Lliga por 1-0 gracies a un gol de guapa factura de Sergi Enrich nel minutu 80.

Más suerte tuvo'l Sporting, anque como contrincante va tener a un vieyu conocíu como'l Numancia, agora en Primera RFEF. L'equipu sorianu, que vien d'eliminar a l'AD San Juan navarru por 0-2, yera ún de los posibles de más nome d'esta categoría, pero nun ta llevando una bona temporada al dir en decimoquinta posición, la que marca la salvación, nel grupu 2 con 13 puntos, a 4 de la promoción pol ascensu y empatáu col Sabadell, primeru de los equipos en descensu.

Los xixoneses lleguen a esta segunda ronda depués de ganar 2-3, con gol nel tramu final de la prórroga, al Beasain, mesmu guión que siguió l'Uviéu n'El Malecón cola Gimnástica. El mesmu resultáu firmó'l Granada, anque nesti casu nel tiempu reglamentariu, col Yeclano.

Otra manera, l'únicu rival de Segunda RFEF que-y podía tocar a un Segunda cayó finalmente pal Eibar y foi'l CD Ibiza Islas Pitiusas. Mentes, la otra eliminatoria ente equipos de la categoría de plata van protagonizala'l Levante y l'Andorra nel Ciutat de València.

El CD Lealtad, elimináu

L'otru representante asturianu na Copa, el CD Lealtad, nun pudo siguir en competición al cayer col Tenerife por 0-2. Los maliayos tuvieron que mudase a Ganzábal poles esixencies de la Real Federación Española de Fútbol y recibió pronto un gol en contra, nel minutu 3 obra d'Alassán, que torgó'l plan de partíu de Christian Pito énte un equipu trés categoríes superior.

Na imaxe, Cedric (Real Racing Club) y Javier Montoya (AD Mérida) saquen les boles de los bombos de Segunda y Primera RFEF, de manera respeutiva.