"El Gomeru" quier espeyar la calidá del cómic n'asturianu

El Muséu de Belles Artes d'Asturies foi testigu de la presentación de la revista de cómics n'asturianu El Gomeru. Isaac del Rivero, Antón García y Ramón d'Andrés esplicaron a los numberosos medios ellí presentes qué va ser esta nueva etapa de la revista, que va repartise de baldre n'escueles y institutos tolos meses

El primeru en falar foi Ramón d'Andrés que disculpó l'ausencia de Carlos Madera, malu de gripe. D'Andrés declaró que la presentación d'esta revista supón "un puntu clave nel procesu de normalización, yá que pa los guah.es tien muncha importancia lleer esto nes escueles". Dempués de reconocer la importancia de contar con una persona de reconocíu prestixu al frente del proyeutu, como ye Isaac del Rivero, d'Andrés recordó que "Asturies nun ye nueva nesto, que tien una llarga trayeutoria nel mundiu de los cómics". Pa rematar d'Andrés dixo qu'esta revista "ufiérta-y al públicu mozu los clásicos del cómic y lo último nes sos tendencies".

L'editor Antón García, responsable de la casa Trabe y d'esta nueva etapa de "El Gomeru" entamo les sos pallabres recordando como "entamamos aquella aventura nel añu 1992 y hasta 1999 con unos 105 númberos y lo arriesgao d'aquella de sacar una revista con una periodicidá selmanal y una distribución importante" y dio anuncia de qu'un de los conteníos de la revista, coincidiendo col cuartu centenariu de "El Quixote", va ser, l'históricu cómic de Victor de la Fuente sobre la obra de Cervantes, que va dase por entregues con cada númberu. Sobre la figura del Coordinador de la revista Isaac del Rivero, García opinó que "ye ponte ente los vieyos dibuxantes y los más mozos" y acabó deseando qu'esta nueva etapa de "El Gomeru" "dure a lo menos, otros 105 númberos más".

Isaac del Rivero, pela so parte, fizo una reivindicación mui sentida del cómic en papel frente a los nuevos medios "un cómic nel ordenador nun ye lo mesmo, a min prestame tenelo na mano". Del Rivero recordó como "l'arte del cómic foi siempre poco valoráu n'Asturies" y como "munchos dibuxantes d'ésitu mundial tuvieron que marchar d'Asturies pa poder vivir d'ello". El dibuxante fizo un convide a tolos dibuxantes d'Asturies a participar na publicación que coordina, "anque nun sepan escribir n'asturianu, que d'eso yá s'encarga'l nuesu traductor Inaciu Galán", y comentó lo importante de la salida d'esta revista pal so usu en clases de llingua y recordó amás que la revista inclúi una fueya de Fauna Astur que va afalar la proteición y la conocencia de la nuesa fauna ente la xente mozo.

L'actu de presentación contó cola presencia de dibuxantes de cómic asturianos de gran prestixu, como Neto y con otros más mozos, que yá demuestren les sos formes nos trabayos qu'espublicen, como Lucía Bande o Iván García