El Gobiernu zarra les cuentes pal 2011 con un descensu del 3’29%

El presidente del Gobiernu asturianu, Vicente Álvarez Areces, anunció esti vienres que l'Executivu integráu por PSOE y IU, "ta a un tris" de zarrar un acuerdu sobre los presupuestos pal 2011 que van subir a 4.133,493 millones d'euros.

Del mesmu mou espera que se ratifique na sesión del próximu conseyu de Gobiernu que se va celebrar el miércoles.
  
Areces, en declaraciones nos pasiellos de la Xunta, indicó que les cuentes suponen un descensu d'un 3,29 por cientu menos sobre'l presupuestu del 2010 tres los axustes desarrollaos a lo llargo del Exerciciu (unos 140 millones menos) y un 6,66 por cientu sobre'l presupuestu inicial (unos 294 millones d'euros menos).
  
El Xefe del Executivu autonómicu destacó'l trabayu desarrolláu "con toa intensidá les últimes selmanes" per parte de los dos fuerces qu'integren el Gobiernu y añadió que falten dellos "pequeños axustes ente partíes" por zarrar, pero la cuantía global yá ta definida y nun se va mover.
  
Anque evitó dar datos concretos y cifres referíes a les conseyeríes hasta que nun s'apruebe per parte del conseyu de Gobiernu, Areces afirmó que'l Presupuestu llogra dar continuidá a les polítiques que se veníen calteniendo a lo llargo del Gobiernu de coalición y aseguró que va contar con "una inversión significativa, sobremanera teniendo en cuenta'l presupuestu consolidáu".
  
"Valoro l'acuerdu porque tamos nun momentu d'austeridá pero al empar de caltenimientu de polítiques que valen a la sociedá asturiana pa encarar la difícil situación, pa caltener el modelu social y los servicios públicos y pa crear una economía competitiva", dixo Areces, que calcó en que les cuentes caltienen los oxetivos básicos del Gobiernu y los aspectos esenciales del acuerdu ente PSOE y IU.