El Gobiernu va proponer a les comunidaes autónomes normes de gastu como les del Estáu

Nel trescursu del Conseyu de Política Fiscal, el Gobiernu va proponer a les comunidaes normes de gastu como les aprobaes pal Estáu y los conceyos el 1 de xunetu. El Conseyu vive una etapa nueva, con mayor presencia de la derecha.
 
Esta norma que va proponer el Gobiernu, aprobada pol Conseyu de Ministros el pasáu 1 de xunetu, supón un cambiu de la Llei d'Estabilidá Presupuestaria que fixa un tope máximu a la subida añal del gastu del Estáu y les entidaes llocales vinculáu a la evolución del PIB a lo llargo de nueve años. En concreto, los oxetivos d'estabilidá presupuestaria van fixase teniendo en cuenta que'l crecimientu del gastu computable de cada alministración nun va poder superar la tasa de crecimientu al mediu plazu de referencia de la economía española. Esta tasa defínese como'l crecimientu media del PIB espresáu en términos nominales mientres nueve años: los cinco anteriores, l'añu en cursu y la previsión de crecimientu de los trés años siguientes. A esta tasa añádese la previsión d'inflación (2,75 por cientu) y con ello fíxase'l gastu máximu.
 
Cuando s'aprueben cambios normativos que supongan aumentos permanentes de la recaudación, la tasa de crecimientu del gastu va poder aumentar na cuantía equivalente. Mentes, cuando s'aprueben cambios normativos que supongan reducciones de la recaudación, la tasa de crecimientu del gastu habrá menguar na cuantía equivalente. En casu d'incumplimientu, l'alministración pública responsable tendrá qu'adoptar midíes estraordinaries d'aplicación inmediata que garanticen la torna a la senda de gastu acordies cola regla establecida.
 
Según l'Executivu, la norma que trata d’espander a les comunidaes autónomes, trátase d'una regla que llenda'l gastu en función de lo que crez la economía y que permite controlar el déficit a lo llargo del ciclu y non añu a añu, polo que les comunidaes podríen facer algo paecío. Ello ye que foi'l mesmu presidente del Gobiernu, José Luis Rodríguez Zapatero, el qu'anunció la intención del Gobiernu de proponer la ellaboración d'esta norma a les comunidaes ante la esistencia de rocees en varies d'elles, y por cuenta de la necesidá d'aplicar de forma estricta la senda trazada pa rebaxar el déficit en toles alministraciones.
 
Na reunión del Conseyu de Política Fiscal y Financiera de güei, onde la derecha va tener más pesu tres los resultaos de les eleiciones del 22 de mayu, tamién va tratase sobre los planes de devolución pendientes de seis comunidaes pola lliquidación global negativa del 2009. Éstes son Catalunya, Illes Balears, Comunitat Valenciana, Andalucía, Extremadura y Castilla-La Mancha.