El Gobiernu va entamar la segunda autovía ente Asturies y Lleón

La secretaria xeneral d'Infraestructures del Estáu, Josefina Cruz, declaró ayeri que l'executivu central va llicitar d'equí en pocos meses, por importe d'un millón d'euros, les obres del primer tramu de la que va ser segunda autopista ente Asturies y Lleón y que'l Gobiernu de Zapatero ufiertó como alternativa pública a l'Autovía del Val.le Güerna, privatizada nel añu 2003 y xestionada pol ente particular Aucalsa. Anque Asturies lo pidiere, el gobiernu central renunció "rescatar" el portalgu del Güerna como fexo con otres autopistes del restu del estáu.

La responsable d'Infraestructures dio l'anuncia de la llicitación d'esta carretera nueva retrucando a les cuestiones que-y planteare la popular Alicia Castro Masaveu na Comisión de Fomentu del Congresu de los Diputaos. Cruz adelantó que yá hebo reuniones ente los responsables en materia d'infraestructures de los gobiernos asturianu y de Casteilla y Lleón. La popular calificó la iniciativa de la segunda autovía ente Asturies y lleón de "autopista fantasma" y alvirtió del dañu mediuambiental que diba causar.

L'actual autopista AP-66, inaugurada nel añu 1984, ye una de les más cares d'España. Un estudiu del diariu El Mundo realizáu va poques selmanes afirmaba que'l portalgu por pasar d'Asturies a Lleón per esta carretera ye l'octavu más caru de tola rede española. El Gobiernu asturianu pidiere nel añu 2005 el rescate del portalgu del Güerna, que l'executivu central del PP espurriere hasta l'añu 2050, pero dende Madrid la rempuesta a la solicitú del executivu asturianu foi la propuesta d'esta segunda autovía, qu'apaeció conseñada nel Plan d'Infraestructures Terrestres del Estáu (PEIT) que s'asoleyó nel branu del 2005. El documentu nun amestaba nenguna de les reclamaciones que se fexeron dende Asturies y oficioalizaba la segunda autopista Asturies-Lleón, mui cuestionada por cargos públicos como l'Alcalde de L.lena, qu'aseguró que nun había sitiu físicu pa construyila, pero con too y con ello, el Gobiernu asturianu, al traviés de la Conseyería de Presidencia congracióse entós oficialmente énte lo que suponía "una inversión superior a los 7.000 millones d'euros p'Asturies" garantizando que'l PEIT "afita les grandes infraestructures de comunicaciones que demandaba la nuestra Comunidá". Mentantu, l'Autopista del Güerna, pa la que'l PSOE prometiere'l desaniciu del portalgu, namás se benefició d'una rebaxa del 30% na tarifa pa los tresportistes, en vigor dende febreru del 2006.