El Gobiernu tramita’l conteníu del estudiu d’impautu ambiental del proyeutu de la mina de Tapia

La Conseyería de Fomentu tramitó’l conteníu del estudiu d’impautu ambiental del proyeutu mineru en Tapia. La Coordinadora Ecoloxista d’Asturies llamenta otra vuelta les prieses del Executivu en funciones cola mina d’oru de Salave.
 
Según señalen dende’l coleutivu ecoloxista, el conteníu de documentu qu’espubliza’l BOPA de güei, firmáu pola conseyera de Fomentu, Ordenación del Territoriu y Mediu Ambiente, Isabel Marqués García, nun atiende “les peticiones xustes que facíamos na Coordinadora y nes que solicitábamos que la empresa presentara un estudiu afayadizu pa subsanar les deficiencies notables nesta fase previa”. Amás, recuerden que, depués de la presentación fecha por Exploraciones Mineras del Cantábrico, filial d’Asturgold, “la empresa faló de camudar el proyeutu, pero nin eso foi suficiente pa que’l Principáu pida un estudiu más rigurosu pal trámite de consultes”.
 
El proyeutu de la sociedad minera en Salave contempla una galería de 2,7 quilómetro y trés pozos de ventilación, y una superficie de 25.000 metros cuadraos destinaos a almacén, taller y vestuarios; una escombrerar pa estériles de 34.000 metros cuadraos con un altor de 12 metros; una planta de tratamientu d’oxidación a presión; y unes balses pa llodos con una capacidá de 7 millones de tonelaes, un altor de 23 metros y una ocupación de 530.000 metros cuadraos, ente otros. “Queda patente, en virtú de les carauterístiques específiques del proyeutu del asuntu, y teniendo en cuenta tolos factores d’orde ecolóxicu, socioeconómicu, arqueolóxicu y cultural señalaos,  l’impautu ambiental nidiu del proyeutu na zona que pue ser irreversible nel casu de facese”, aseguren dende la Coordinadora.