El Gobiernu refuga a la Coordinadora Ecoloxista l'accesu al espediente sancionador pol arramáu d'Aboño

50 díes depués de presentar la denuncia pol arramáu d’HC Energía n’Aboño énte Mediu Ambiente, la Coordinadora Ecoloxista recibió una respuesta del Gobiernu. Ésti refuga a los ecoloxistes l’accesu al espediente sancionador.
 
Nun escritu que la organización recibió güei, la Secretaría Téunica de la Conseyería de Fomentu, Ordenación del Territoriu y Mediu Ambiente indica-y que refuga l’accesu al espediente sancionador al nun considerar “interesada a l’asociación nel espediente alministrativu, lo qu’entendemos que ye un error grave, yá qu’hai munches sentencies qu’establecen la llexitimidá d’este tipu d’asociaciones ecoloxistes pa ser parte interesada nos procedimientos alministrativos sancionadores”, apunten dende la Coordinadora Ecoloxista d’Asturies, coleutivu qu’añade que la carta tamién informa de que’l Gobiernu nun va imponer nenguna midida preventiva a HCEnergía, l’antigua Hidroeléctrica del Cantábrico, pa evitar episodios de contaminación similares na ría d’Aboño. Pa los ecoloxistes, “nun dexa de ser sorprendente que’l Principado tarde 50 díes pa responder a la nuesa denuncia, al traviés d’esti escritu, onde una vegada más vese l’interés del Principado porque naide sepa de la tramitación del procedimientu sancionador”, lo qu’amuesa que se quiere ocultar “lo que se ta cocinando cola empresa, pa qu’al final quede en nada l'arramáu grave de la térmica de Aboño”.
 
D’igual forma, dende la Coordinadora quieren recordar que’l Gobiernu “tovía nun  respondió a los nuesos pidimientos d’información fechos a la Conseyeria de Presidencia, Direición de Salú Pública y Conseyería de Fomentu sobre quiénes foron los responsables d’abrir al bañu les playes de Carreño ensin tener los resultaos analíticos d’hidrocarburos fechos, asina como tampoco nun se nos facilita copia de dichu análisis solicitáu hai mas de 40 díes”. Por último, la organización apunta que “nun hai que cayer nel alarmismu col arramáu y les sos consecuencies”, pero que “nun podemos dexar que les autoridaes caigan na neglixencia como paez que ta asocediendo con esta negativa a poder acceder a los espedientes sancionadores y ser asina parte d’una denuncia que presentamos”.