El Gobiernu recurre l’alcuerdu de la oposición pa recuperar el control de les decisiones económiques

El Conseyu de Gobiernu decidió en sesión estraordinaria recurrir l’alcuerdu de la oposición pa recuperar el control parllamentariu de les decisiones económiques. Insta a la Mesa de la Xunta a aplicar el so reglamentu.
 
Según esplicaron a los medios de comunicación el conseyeru de Presidencia, Florentino Alonso, y el viceconseyeru de Sector Públicu, Luis de la Vallina, el Gobiernu toma esta decisión pola "inconstitucionalidad" de la tramitación de la proposición de Llei que "namái pretende impedir el llabor del Gobiernu". Por ello, el Conseyu decidió instar a la Mesa de la Xunta Xeneral a que aplique’l so Reglamentu "pa poder tomar en consideración la proposición de Llei presentada’l vienres pasáu na Xunta polos trés grupos parllamentarios y notificada’l miércoles pasáu a la Conseyería de Presidencia".
 
"La Mesa de la Xunta tresformó un plazu de respuesta de diez díes a que tien derechu’l Gobiernu nun tope de respuesta de cincuenta y dos hores, esto ye, una reducción del plazu de casi’l 80 por cientu", reprochó l’Executivu. D’igual forma, sostién que "el procedimientu ideáu para cortar los plazos foi’l siguiente: los trés grupos parllamentarios presentaron la proposición na Xunta’l vienres 21, a les 13.53 hores y ante los medios de comunicación el llunes 24. La Xunta Xeneral unvía un fax a la Conseyería de Presidencia’l martes 25, a les 15.01 hores nel que s’anuncia l’admisión a trámite d’una proposición de Llei ensin acompañar el testu.  Nel mesmo fax indícase que se declara d’urxencia la tramitación de la propuesta pola gravedá de la situación, con una reducción de plazos, perbaxo inclusive de la metá, fixando como tope pa la manifestación del criteriu del Conseyu de Gobiernu enantes de les 14 hores del vienres 28". Un tiempu nel que "resulta imposible evaluar l’asuntu y facer l’informe correspondiente”, considera.