El gobiernu quier llevar internet de banda ancho al 100% de la población

El Gobiernu asturianu va collaborar con un plan de la Secretaría d'Estáu de Telecomunicaciones y pa la Sociedá de la Información (SETSI) pa desaniciar les torgues nel accesu a internet de banda ancho qu'esisten nel estáu y universalizar dafechu l'accesu en condiciones a la rede pa tolos ciudadanos d'equí al 2008.

La posibilidá de contratar banda ancho llega anguaño al 92,2% de la población asturiana. Queden 83.749 habitantes que nun puen contratala y17.000 d'ellos tienen amás llinies telefóniques TRAC que nun permiten la conexóna la rede. El Gobiernu asturianu en collaboración col Ministeriu de Ciencia y Tecnoloxía quier universalizar la banda ancho d'equí al 2008

Esisten anguaño n'Asturies 22 conceyos nos que ye imposible dafechu acceder a internet con banda ancho, mientres que nun total de 46 hai bien de parroquies y llugares dende les que tampoco ye posible la conexón. Llevao esto a población, les cuentes de la SETSI y el Principáu dicen qu'hai un total de 83.749 asturianos que nun puen entrar a internet pela banda ancho. Pa más de 13.700 d'estos, nun esiste tampoco la conexón de baxa velocidá, en cuantes que sufren la torga de nun tener más preséu de comunicación que'l teléfonu rural. El problema tóca-yos sufrilu a los particulares, pero tamién a les empreses. De los 75.909 locales con actividá económica qu'hai n'Asturies, son más de 5.000 los que nun tienen posibilidá de contratar banda ancho. Según los datos oficiales, ún de cada trés contrataríenlo si pudieren.

Pa universalizar dafechu la banda ancho, la SETSI ta sacando alantre un programa en collaboración coles Comunidaes Autónomes. Les midíes que contempla'l programa incluyen la concesión de subvenciones y ayudes a empreses esplotadores de redes y prestadores de servicios de comunicaciones. Les ayudes nun van condicionase a l'adopción d'una tecnoloxía concreta, de manera que cada ufierta pue presentase col encontu técnicu que se vea más afayadizu, anque'l preciu y les prestaciones pa los usuarios han ser "similares al mayoritariamente disponible" Según los datos apurríos pola Conseyería d'Induustria cuéntase con que les primeres alxudicaciones pa dar serviciu de banda ancho en lugares onde nun lo haya se faigan yá en xunetu d'esti añu.

L'obxetivu final ye que nel añu 2008 más de 2,5 millones d'habitantes del mediu rural en toa España, 87.000 d'ellos n'Asturies, puedan acceder al mesmu serviciu qu'agora ta llendáu a les ciudaes. El Ministeriu trabaya pa esti ambiciosu plan con un presupuestu de 146,3 millones d'euros a invertir nuna combinación de subvenciones y créditos ensin interés a diez años contrés de carencia.