El Gobiernu quier ampliar l’usu de les llingües cooficiales nel Estáu

El Gobiernu ta trabayando nun proyectu de llei pa que los ciudadanos puean dirixise en cualquier llingua cooficial a determinaos organismos estatales. L’asturianu nun entra nesti proyectu que nagua por “garantizar los derechos llingüísticos”.

L'anunciu fízolo nel Congresu'l vicepresidente terceru del Executivu y ministru de Política Territorial, Manuel Chaves, que desveló qu'existe yá un grupu creáu nel so Departamentu pa redactar esti proyectu de llei que regule l'usu de les llingües cooficiales na Alministración Xeneral del Estáu.

La iniciativa, de la que nun ofreció más detalles, va afondar nel oxetivu del Gobiernu de "siguir trabayando" pa garantizar l'usu de toles llingües y meyorar la situación actual, amás de solucionar les faltes existentes y les "insuficiencies" que tovía existen, según reconoció Chaves. Les llingües non oficiales non entraríen nesta midía.

"Soi consciente de qu'hai que facer trabayu bastante, hai coses por facer y por meyorar, y asegúro que nello ta'l Gobiernu", afirmó al empar que reclamó que tamién se reconozan les meyores producíes mientres los últimos años y l'esfuerzu del Executivu de José Luis Rodríguez Zapatero.

“Innegable meyora”
Según defendió, España alcuéntrase "nel meyor momentu de la so historia democrática", no referente a la normalización de les llingües cooficiales, algo que según calcó débese a la "innegable meyora" de los últimos años pa cumplir el mandatu constitucional de cooficialidá de les llingües.

Pa ello, reconoció que se tuvieron qu'establecer "prioridaes", sobretoo nel actual contestu de crisis económica, pero punxo dellos exemplos que demuestren la so "voluntá", como los acuerdos algamaos con numberosos organismos de la Unión Europea.

Respuesta al PNV
Chaves ofreció estes esplicaciones nuna interpelación del diputáu del PNV Aitor Esteban, qu'aludió a los asuntos que queden pendientes, como la relación de los ciudadanos cola Tesorería Xeneral de la Seguridá Social, col INEM o col Ministeriu del Interior pa la renovación del DNI o'l Pasaporte.

Pa ello, anque reconoció les meyores producíes, pidió al Gobierno compromisos concretos y la fixación d'oxetivos marcando los plazos d'execución.