El Gobiernu propón a Rafael Fernández y Alberto Aza pa recibir la medaya d’oru d’Asturies

Rafael Fernández Álvarez, primer presidente del Consejo Regional de Asturias, y Alberto Aza, xefe de la Casa del Rey, son les propuestes del Gobienu pa recibir la medaya d’oru d’Asturies. El reconocimientu va entregase’l 7 de setiembre.
 
L’uviedín Rafael Fernández Álvarez (1913) finó n’avientu del 2010 a los 97 años y recibirá la medaya a títulu póstumu. Foi dirixente de la Federación Socialista Asturiana (FSA) y formó parte na Guerra Civil del Conseyu Soberanu d’Asturies y Lleón. Tres el so regreso a Asturies tres un exiliu llargo en México, ocupó’l cargu de presidente del Consejo Regional de Asturias y, cola aprobación del Estatutu d’Autonomía, foi’l primer presidente d’Asturies, cargu que mantuvo hasta les primeres eleiciones autonómiques del 1983. Amás, Fernández Álvarez foi senador ente 1977 y l’añu 2000.
 
Mentes, Alberto Aza Arias (Tetuán, 1937) ye diplomáticu y tuvo, ente otros destinos, el d’embaxador del Estáu en Belice, México y Reinu Xuníu, amás del cargu de direutor xeneral de la Oficina de Información Diplomática. Tamién foi secretariu xeneral de la Casa del Rey ente setiembre y avientu del 2002 y, dende esa fecha última, ye xefe de la Casa.
 
Amás d’estes dos medayes d’oru, Francisco Álvarez-Cascos propunxo a cinco persones pa recibir la medaya de plata, a la qu’hai que sumar la yá conocida d’Emilio Llamedo, presidente del Comité Organizador del Seya que morrió hai a finales de xunetu. Blanca Álvarez Pinedo (ex direutora del Archivu Históricu d’Asturies), Emilio García-Pumarino Ramos (ex presidente d’UCD n’Asturies), Gerardo Iglesias Argüelles (ex secretariu xeneral del PCE y fundador y primer coordinador xeneral d’Izquierda Xunida) y Jesús Sanjurjo González (primer secretariu de la FSA) son les persones que recibirán esti títulu’l 7 de setiembre. A esta llista hai que sumar el nome de Juan Luis de la Vallina Velarde, ex presidente de la Diputación Provincial y presidente d’Alianza Popular n’Asturies, que finó hai agora un añu.
 
Por último, los fíos predilectos d’Asturies propuestos por Álvarez-Cascos son José Ramón Álvarez Rendueles (ex presidente de la Fundación Príncipe), Juan Cueto Sierra (empresariu) y José Antonio Nespral Tirador (presidente del Centru Asturianu de Buenos Aires).