El Gobiernu pretende xubir les pensiones un 1 por cientu nel 2013

L’anteproyeutu de la Llei de Presupuestos pal 2013 incluyirá una xuba d’un 1 por cientu nes pensiones. El Gobiernu del Estáu tamién quier caltener la compensación pola esviación del IPC nel mes de payares.

Asina, el documentu nun va recoyer nengún cambiu normativu na Llei Xeneral de Seguridá Social, que sería necesario pa nun revalorizales en función del IPC. El Gobiernu del PP yá xubió les pensiones un 1 por cientu anguaño, depués de la conxelación que sufrieron nel 2010 col Executivu de José Luis Rodríguez Zapatero. Agora van esperimentar tamién una alza del 1 por cientu nel 2013, anque los pensionistes van ver aumentaes les sos nómines percima d'esa cantidá. Y ye qu'a esi porcentaxe del 1 por cientu va haber que sumar la compensación que va tener qu'abonar el Gobiernu de Mariano Rajoy pola esviación de la inflación d'anguaño y que, según les fontes consultaes por Europa Press, va caltenese nos mesmos términos que marca la Llei Xeneral de la Seguridá Social.

Anguaño, l'IPC interañal ta nel 2,7 por cientu, colo qu'habría que compensar a los pensionistes por esa diferencia de 1,7 puntos. Sicasí, la referencia pa revalorizar les pensiones ye la inflación interañal de payares, que se va conocer dientro d'un par de meses. Esa fienda podría aumentar o amenorgase, anque lo normal ye que la xubida del IVA prima l'IPC a l'alza.

Cada décima d'esviación de precios implica pal Gobiernu un costu d'unos 100 millones d'euros pa compensar a los pensionistes, polo que con una inflación en payares del  3 por cientu, el costu avérase a los 2.000 millones, a los qu'habría que sumar otros 2.000 millones pa consolidar esa diferencia na nómina de les pensiones. L’Executivu tenía nidio que la última partida a tocar yera les pensiones y asina lo dixo tanto'l presidente del Gobiernu, Mariano Rajoy, como la vicepresidenta, Soraya Sáenz de Santamaría, que fai un par de díes declaró qu’éstes "diben axustase a la xubida de la vida".