El Gobiernu pretende poner en marcha’l salariu mozu n’avientu

El salariu mozu, proyeutu de FAC pa promover l’emplegu ente los menores de 30 años, va ser una realidá n’avientu. El conseyeru José Manuel Rivero anunciólo esti llunes na Comisión d’Economía y Emplegu de la Xunta Xeneral.
 
Esta iniciativa, incluyida nel programa eleutoral del partíu al frente del Gobiernu, va articulase según la cualificación presentada polos solicitantes y va ponese en marcha al traviés de conceyos, entidaes llocales y la Universidá con una duración máxima de 12 meses. Asina, va haber dos modalidaes de contratu, ún pa la formación y aprendizaxe, dirixíu a los menores de 30 años ensin formación, y otru en práutiques p'aquellos mozos y moces cualificaos que nun llograron un emplegu na so área d'especialización.
 
Al respeuto, la diputada del PP Susana López Ares entrugóse si esta propuesta “nun ta inventada yá” y quixo saber qué diferencia les modalidaes esistentes pa la formación y l'emplegu en práutiques pa mozos. Nesta llinia, el conseyeru d’Economía y Emplegu indicó que nun se trata d'un contratu en práutiques “ensin más”, sinón que va entregar formación a los mozos y moces ensin cualificar, que sumen unos 3.000 de los 18.000 xóvenes asturianos paraos. “Nun sólo va ser un trabayu temporal, sinón que va dexar meyorar la so capacitación”, dixo Rivero resaltando que coles mesmes “va dar una oportunidá d'emplegu” p'aquéllos que cuenten con una titulación reglada y nun alcontraron trabayu. “Trátase, entós, de dos midíes integraes nuna”, puntualizó la diputada del PP.
 
Pela so parte, el diputáu d'IX-LV Jesús Iglesias preguntó si va incluyise tamién a l'Alministración autonómica, a lo que'l conseyeru respondió que se refugó esa posibilidá concretando que les partíes van repartise en función de la tasa de paru de cada conceyu. Asina, Iglesias dixo que nun supón nada nuevo dende'l Plan Piles del Conceyu de Xixón. Otra manera, El conseyeru, que tuvo acompañáu na so intervención pol viceconseyeru de Política Sectorial, Jesús Rubió, definió como prioridá del so departamentu la creación d'emplegu y la meyora de l'actividá económica asturiana, que considera que tán “vinculaes de forma direuta”. Polo tanto, Economía y Emplegu estudia reformar l’Observatoriu Públicu d'Emplegu, reforzar el papel de les oficines d'emplegu nel so llabor d'intermediación y collaborar cola axencia d'ubicación de la Universidá.
 
D'igual forma, garantizó que l'Executivu asturianu va impulsar sectores tradicionales como la minería, la industria naval y la metalmecánica pol so pesu na economía asturiana, complementándolos con sectores innovadores y d'industria llixero, col propósitu d'ameyorar l'actividá económica del país.