El Gobiernu presentó la web oficial pa les elecciones de mayu

La conseyera de la Presidencia, María José Ramos, presentó esti fin de selmana'l portal web oficial dende'l que'l Gobiernu asturianu va apurrir tola información sobre les elecciones autonómiques del próximu 27 de mayu. La web www.eleccionesasturias2007.es, estrémase per una parte nuna web electoral con tolos datos precisos pa poder exercer el derechu al votu, incluyendo rempuestes a les duldes que más se dan o los deberes y derechos de los votantes, mientres que la segunda parte de la páxina va permitir, la nueche del 27 de mayu, siguir en tiempu real la evolución de los resultaos electorales.

La web, que ta disponible en castellanu, ensin presentar nada de los sos conteníos n'asturianu, ufierta tamién una axenda electoral na que s'inxerta una rellación de los actos más importantesdel procesu electoral y tola actualidá sobre'l mesmu, amás de la rellación de miembros de les candidatures presentaes polos partíos políticos, la rellación de meses y escueles electorales o los resultaos de convocatories anteriores.