El Gobiernu muéstrase favoratible a la figura de la dación en pagu

El Conseyu de Gobiernu alcordó esti xueves la toma en consideración de la dación en pagu. Va presentar una proposición de llei, qu’ha d’aprobase primero na Xunta Xeneral, pa la modificación de la Llei Hipotecaria.
 
Según informó l’Executivu, esti cambiu permetiria “esceicionar el principiu xeneral de responsabilidá patrimonial universal y sustituyilu, en casu d’ hipoteca sobre vivienda, pol principiu de responsabilidá llendada, esto ye, la dación en pagu o entrega del inmueble pa saldar la deuda. Esta posibilidá daríase cuando se cumplieren dos circunstancies: que se trate d’una hipoteca constituyida pa garantizar préstamos o creitos destinaos a financiar l’adquisición y que se trate d’ un préstamo o creitu concedíu por un financiador profesional, tenga o non la condición d’entidá de creitu.
 
La proposición de llei faese a l’abullugu de lo dispuesto nel artículu 87.2 de la Constitución, qu’establesz que les asamblees de les comunidades autónomas pueden solicitar del Gobiernu estatal l’adopción d’un proyeutu de llei o remitir a la mesa una proposición de llei, delegando énte la Cámara un máximu de trés miembros de l’Asamblea encargaos de la so defensa. Esta iniciativa tien un precedente sentáu pola Xunta Xeneral con ocasión de l’aprobación de la Llei 47/1997, del 20 de payares, de la inclusión de la variante de Payares nel Plan Direutor d’Infraestructures.