El Gobiernu llanza una campaña p'apoyar productos asturianos

La Conseyería de Mediu Rural y Pesca llanza, el segundu añu siguíu, la campaña publicitaria 'Soy lo que como, como lo que soy', cola que busca elevar el consumu de productos agroalimentarios asturianos mientres les fiestes navidiegues.

Amás de favorecer el consumu d'estos productos, la campaña tien como oxetivu presentalos como un elementu más de la cultura y l'autenticidá asturiana, destacando la so escelente calidá y sabor, según informó la conseyería.
  
Coles mesmes, busca informar sobre la variedá de los productos agroalimentarios asturianos y, sobremanera, sobre aquéllos que cuenten con algún sellu de calidá européu: los quesos Cabrales, Casín, Gamonéu, Los Beyos y Afuega'l Pitu; la Sidra; la Faba; el vinu de Cangas; el Choscu de Tinéu; la Escanda, o los productos de l'agricultura y la ganadería ecolóxica.
  
P'algamar estos oxetivos y llegar a toos de la forma más directa posible, l'axencia Eteria, responsable de la campaña, parte d'una frase fecha bien conocida: "Yes lo que comes", que se tresforma al unila con una fibra bien sensible pa cualquier asturianu: el so arguyu de selo.
  
Asina, crea'l conceptu, 'Soy lo que como, como lo que soy', qu'añade a la campaña un sentimientu reivindicativu de pertenencia a un grupu: 'Siéntome asturianu'.
  
Pa la parte más visual de la campaña, Eteria usa la imaxe mundialmente conocida de 'I Love NY' adaptándola a lo que demandaba esta campaña. Asina, cambia'l corazón presente nel slogan orixinal por botelles de sidra, trozos de carne de xata y fabes.
  
La Conseyería de Mediu Rural y Pesca destinó a la puesta en marcha d'esta campaña 130.000 euros y va tar presente nos medios de comunicación dende'l miércoles día 1 d'avientu hasta'l próximu día 24.