El Gobiernu incorpora Roma a los destinos internacionales pa coneutar l'aeropuertu

El concursu nuevu p’aumentar la coneutividá internacional del Aeropuertu d’Asturies, depués del recursu presentáu por Volotea, amplía de 5 a 8 los destinos incluyíos. A Inglaterra, Bélxica, Italia, Alemaña y Portugal incorpórase l’aeródromu de Roma y una conexón a Países Baxos, Éire o la población alemana de Frankfurt, amás de París.

La ufierta inicial afitaba enllaces direutos con Londres, Bruxeles, Milàn, Düsseldorf y Lisboa. Agora amiesta tamién Roma y París, onde vuela yá Vueling, y un octavu destín ente Ámsterdam, Dublín y Frankfurt am Main, mentes que desapaez Barcelona, anguaño coneutada tamién por Vueling.

Les compañíes interesaes tienen hasta’l día 10 de febreru pa presentar ufiertes a Recrea. El concursu preséntase como de promoción turística y pal mesmu destínense 10,1 millones pa caltener la programación hasta abril del 2026, ampiándolu un añu con respeuto al anterior.

“Pa la escoyeta de los destinos tuviéronse en cuenta datos históricos de pasaxeros, los principales tráficos que tuvo Asturies puntu a puntu, l’análisis de pasaxeros indireutos que faen escales n’otros aeropuertos p’acceder a estos destinos y tamién les tendencies de mercaos fechos al traviés de los diferentes restoladores de vuelos”, esplicó Jorge García López, viceconseyeru d’Infraestructures, Movilidá y Territoriu, qu’apuntó que contó col asesoramientu del Departamentu de Marketing d’Aena. Sobre’l recursu de Volotea del 25 de setiembre y la resolución del Tribunal Alministrativu Central de Recursos Contractuales, apuntó que se decidió entamar esta otra llicitación “p’axilizar la tramitación”.

Agora namái a París

Nestos momentos Asturies cuenta con una única conexón internacional a París, a la qu’hai que sumar les de Madrid, Barcelona, València, Málaga, Alacant, Sevilla, Mallorca, Tenerife Norte, Tenerife Sur, Gran Canaria y Lanzarote. La iniciativa del Gobiernu pretende aumentar la ufierta del aeropuertu asitiáu en Santiagu’l Monte con estes 8 places en llotes separtaos, a diferencia del anterior concursu, presentáu nun únicu llote, acutando places mínimes de los aviones y otros condicionantes operativos, y va valorar les frecuencies y places ufiertaes, el plan de marketing y promoción y la ufierta económica.