El Gobiernu homenaxea a Xovellanos nel bicentenariu de la so muerte

Una ufrienda floral nel monumentu dedicáu al ilustráu xixonés n’Uviéu y la inauguración d’una esposición nel Belles Artes conformaron l’actu d’homenaxe del Gobiernu a Xovellanos. Gabino de Lorenzo nun participó na celebración.
 
El 27 de payares de 1811, Gaspar Melchor de Xovellanos finó en Veiga por una pulmonía causada por un temporal mientres viaxaba en barcu direición a Galicia tres un contrataque de les tropes franceses en Xixón. Doscientos años depués, el Gobiernu quixo face-y un homenaxe nel monumentu llevantáu pola Xunta Xeneral na cai que lleva’l nome del ilustráu n’Uviéu, actu al qu’acudió Francisco Álvarez-Cascos, presidente del país; el conseyeru de Cultura y Deporte, Emilio Marcos Vallaure; el conseyeru de Presidencia, Florentino Alonso Piñón; el rector de la Universidá d'Uviéu, Vicente Gotor; l'alcaldesa de Xixón, Carmen Moriyón; y l’arzobispu d’Uviéu, Jesús Sanz. Mentes, nun participó na celebración l’alcalde llocal, Gabino de Lorenzo.
 
Tres la ufrienda floral, el presidente destacó la "valentía" de Xovellanos pa "proponer reformes fondes ante la crisis d'un réxime que-y valieron la incomprensión, la persecución y el castigu de los inmovilistes y los revolucionarios" y agradeció-y los sos desvelos pa "sentar les bases de la nueva Asturies y de la España moderna". Pela so parte, el responsable de Cultura recordó que'l monumentu –el primeru públicu dedicáu a un particular nel Estáu– elevóse nel 1798 por mandatu de la Xunta Xeneral como memoria viva del compromisu de Xovellanos cola so tierra y anunció que les sos corones, estropiaes pol pasu del tiempu, van ser restauraes llueu.
 
Amás, nesta mesma xornada, les autoridaes inauguraron nel Muséu de Belles Artes una esposicíón entitulada 'Xovellanos y el so entornu' na que se recueye una seleición de 42 obres rellacionaes col políticu y el contestu nel que vivió, atesoraes pol Muséu mientres los sos trés décades d'existencia. La muestra, qu'inclúi materiales inéditos, estructúrase en siete seiciones que rexistren otros tantos apartaos de la vida y obra del ilustre asturianu. Ente les obres espuestes destaca el retratu de Xovellanos fechu por Francisco de Goya ente los años 1780 y 1782 que, según Cultura, el Belles Artes caltuvo gracies a les xestiones feches nel añu 2000 pol daquella vicepresidente primeru del Gobiernu estatal, Álvarez-Cascos, que pela tarde participó n’otru homenaxe al ilustráu, nesta ocasión en Veiga, onde recordó que Xovellanos yá señaló na so época que los problemes del país "nun radiquen tanto na so probeza natural, sinón na xestión mala d'unos recursos suficientes en diversidá y bayura pa garantizar el bienestar de la población".