El Gobiernu financia con 2,7 millones d’euros el Programa Severo Ochoa d’ayudes a investigadores

El Conseyu de Gobiernu d’esti martes aprobó financiar con 2.746.889 euros el Programa Severo Ochoa d’ayudes pa la formación en docencia e investigación. Estes beques ayudarán a 160 persones a terminar les sos tesis doctorales.

Según esplica l’Executivu, “les beques Severo Ochoa tienen por oxetu la formación de profesionales pal sistema de ciencia y teunoloxía n’Asturies. Con esta convocatoria el Gobiernu del Principáu ratifica la continuidá de les ayudes, calteniendo’l presupuestu destináu a esta convocatoria”. A lo llargo del mes de marzu anunciaráse la convocatoria, adaptada defechu a la Llei de la Ciencia, “lo que permitirá como novedá principal que dende’l primer día los beneficiarios cuenten con un contratu llaboral, non como ocurría hasta agora, que nos dos primeros años yeren consideraos becarios”. Asturies ye ún de los primeros países del Estáu n’entamar esta adaptación.

Otros alcuerdos algamaos güei son l’autorización d’un conveniu cola Escuela Universitaria Padre Enrique de Ossó y l’aprobación de la concentración parcelaria del monte de Coubos, en Cangas del Narcea. El primeru va permitir que l’alumnáu del tercer cursu del centru priváu pueda facer práutiques de Terapia Ocupacional en centros adscritos a la Direición Xeneral de Polítiques Sociales de la Conseyería de Bienestar Social y Vivienda.