El Gobiernu estudia xunir el 112 y Bomberos d'Asturies

El conseyeru de Presidencia, Florentino Alonso Piñón, anunció que l’Executivu ta estudiando la posibilidá d'unificar el 112-Asturies y Bomberos d’Asturies. D’esta forma busca una “mayor eficacia” al mesmu tiempu que s’aforren costes.
 
Alonso Piñón fixo estes manifestaciones na so comparecencia na Xunta Xeneral dientro del ciclu d’intervenciones que tán faciendo tolos miembros del Gobiernu asturianu ante la Cámara. El dirixente señaló que la unificación de los dos entes públicos, creaos nel 2001, tendría que suponer un cambiu llexislativu. “Somos conscientes d'eso y tamos estudiándolo”, comentó. En too casu, a entrugues del PSOE, dexó claro que nun va privatizase nin el 112 nin Bomberos.
 
Pela so parte, nel turnu d'entrugues d'IX-LV, Piñón reconoció que la so intención de que los centros asturianos repartíos pel mundu valgan pa una rede comercial tien “dificultaes”, anque señaló que ye necesario esforciase pa nun escatimar esfuerzos en que los emigrantes asturianos sían “la punta de llanza” d'Asturies nel esterior. “Ellos han ser los nuesos primeros promotores y entamadores”, afirmó, señalando que l'oxetivu ye da-yos les “máximes facilidaes”. Jesús Iglesias tamién pidió al conseyeru la so opinión al respeuto del cambiu llegal que s’introduxo nes eleiciones pa la emigración, esto ye, el sistema de votu rogáu qu'ha solicitase de primeres per corréu. Piñón dexó claro que nun-y presta'l sistema y que nes eleiciones últimes munchos asturianos nun pudieron exercer el so derechu al votu. Calificólo de “erru” y dixo que, anque ye una competencia estatal, el Gobiernu asturianu apuesta pola so revisión porque ye “regresivu”.
 
Xunto con Piñón, compareció na Xunta'l viceconseyeru de Comunicación, Carlos Prieto, que caltuvo un enfrentamientu dialéuticu cola diputada del PSOE, Ana Rosa Migoya. Ésta acusó al Gobiernu asturianu d'utilizar la web institucional d'Asturies pa dar publicidá a noticies del presidente Francisco Álvarez-Cascos que namái beneficiaben al so partíu, Foro Asturias Ciudadano (FAC). El periodista refugó eses acusaciones y dixo que tolo que s'inclúi na web ye baxo criterios periodísticos porque les declaraciones del presidente d'Asturies son “d'interés ‘rexonal’”. Amás, dixo qu'ési ye'l procedimientu que s'usa n'otres comunidaes autónomes y qu'hasta n'Asturies, cuando'l socialista Vicente Álvarez Areces yera presidente, la web del Gobiernu asturianu agospiaba vídeos que teníen que ver más col PSOE que con Asturies.
 
Reacciones de la oposición
 
Mientres la comparecencia, y en determinaes entrugues, Piñón reconoció que nun disponía nesi momentu de los datos y comprometióse a entregalos per escrito. “La mayoría de les cuestiones plantegaes quedaron pa mañana. Yá veremos, o non, si nun ta nin se-y espera”, dixo la diputada del PSOE, María José Ramos nel so turnu de fixación de posiciones. Sicasí, Ramos señaló que'l conseyeru tendrá que volver a comparecer pa los presupuestos nacionales y ehí sí van conocese les verdaderes intenciones del so departamentu. “Nun sé si ye que nun supieron qué dicir o nun quisieron facelo güei”, apuntó.
 
Nel PP consideraron que la comparecencia foi insuficiente. “Hai que venir meyor preparáu”, dixéron-y al conseyeru. Según la diputada del PP Ana Barrientos, la conseyería de Presidencia tendría que llamase, en realidá, “del presidente” porque ta “al serviciu” d’Álvarez-Cascos. Barrientos tamién reprochó a los responsables de la conseyería la so “opacidá informativa”.
 
Pela so parte, el voceru d'IX-LV, Jesús Iglesias, allabó la “prudencia” de los responsables del país, anque dixo que se pasaren, llegando a ser “reservones”. Iglesias cree que les coses importantes nun van sabese hasta depués de les eleiciones xenerales del 20 de payares. Por último, el voceru de FAC na Comisión, Fidel Sánchez, dixo que'l programa plantegáu por Piñón “sintoniza dafechu” col programa eleutoral col qu'acudió a les nacionales el so partíu. Dende Foro consideren que les polítiques hacia emigrantes y retornaos han de ser una “prioridá” y aplaudieron l'esfuerzu d'austeridá nos distintos departamentos.