El Gobiernu estatal propón que los pensionistes paguen un 10 por cientu de les melecines

|

La ministra Ana Mato va proponer esti miércoles a los conseyeros de Sanidá que los pensionistes paguen un 10 por cientu de les melecines. Les persones actives abonaríen el 50 por cientu en cuenta del 40 por cientu actual.
 
Asina, la responsable de Sanidá solicita a les comunidaes autónomes l'establecimientu del copagu farmacéuticu por renta en llugar de por criterios d'actividá llaboral, como pasa agora. Esta decisión de Mato indica que'l Gobiernu estatal refuga’l copagu d'un euru por receta, que yera la otra posibilidá que s'embaraxaba siguiendo lo establecío pol Gobiernu catalán, y que va ponese en funcionamientu nes selmanes próximes, según esplicaron fontes del conseyu consultivu del Sistema Nacional de Salud (SNS). Pel momentu, l’Executivu refugó que los ciudadanos vayan pagar pola asistencia sanitaria y precisó que la posible progresividá en función de la renta, apuntada pol ministru d'Economía y Competitividá, Luis de Guindos, ta estudiándose namás pa les melecines.
 
En repitíes ocasiones, señalóse que l'oxetivu d'esta midida sería averar el porcentaxe del gastu en farmacia n'Estáu al que tienen los vecinos europeos, pa lo que, señalaba, "confíen en contar col máximu acuerdu de les comunidaes". En materia de farmacia, la principal midida a estudiar va ser la central de compres conxunta y va presentase un informe sobre la propuesta de mecanismos de "actualización y aportación reducida" na prestación farmacéutica nel SNS. Amás, van vese les propuestes de definición de criterios mínimos d'ordenación farmacéutica. Tamién va tratase la creación del grupu de trabayu que fixe criterios pal nomenclátor maestru, ente otros munchos asuntos. El nomenclátor de melecines, qu'actualiza Sanidá, permite acceder a tola información económica y alministrativa de toles melecines y productos sanitarios.
 

Contador Estadistiques