El Gobiernu español fala de 41 años cotizaos pa xubilase a los 65

|

El ministru de Trabayu y Inmigración, Valeriano Gómez, calcó en que la idea del Gobiernu ye ampliar a 67 años la edá llegal de xubilación y caltener la posibilidá de retirase a los 65 años pa carreres llargues de cotización.

Nesti sen, repitió en delles ocasiones que la "propuesta inicial" ye la de cotizar 41 años pa poder xubilase a los 65 años y recordó que, en cualquier casu, l'ampliación de la edá de xubilación a los 67 años va facese de forma progresiva, dende'l 1 de xineru del 2013 hasta l'añu 2027.
  
En rueda prensa tres la Conferencia Sectorial d'Asuntos Llaborales, Gómez negóse a dar detalles de la negociación que caltién con sindicatos y empresarios por respetu a ellos, pero sí adelantó que les conversaciones "van intensificase" nos próximos díes pa tratar de llograr un acuerdu antes del vienres, fecha prevista pa l'aprobación del anteproyectu de llei nel Conseyu de Ministros.
  
Tamién indicó que mientres el día de güei y parte de mañana entainaránse les negociaciones colos Grupos Parlamentarios pa tratar de llograr el mayor apoyu posible a la reforma. Gómez espresó'l so deséu de que l'acuerdu en pensiones puea algamase enantes del debate parlamentariu, pero "nun lo consideró una condición imprescindible".
  
Sobre privilexos

Per otru llau, el ministru mostróse a favor de que los diputaos nun tengan "privilexos" al cobrar una pensión, pero tamién dixo que nun tienen que salir perxudicaos por participar na acción política. "Que s'entre y se salga de l'actividá pública sin qu'eso suponga graves perxuicios, pero nes pensiones nun pue haber distinciones", sorrayó.
 

Contador Estadistiques