El gobiernu español aconcéyase pa tratar la situación de los inmigrantes en Canaries

La vicepresidenta primera del Gobiernu español María Teresa
Fernández de la Vega aconcéyase güei pela mañana colo
ministros de Trabayu y Asuntos Sociales, col responsable de la cartera
d'Interior, y con varios altos cargos con competencies n'inmigración pa
tratar la situación creada pola llegada masiva d'inmigrantes ensin
papeles a Canaries.



Ello ye qu'en trés díes llegaron más de mil inmigrantes
ensin papales a les costes de les Islles Canaries. Fernández de la Vega
yá anunció ayeri que'l gobiernu va entainar coles repatriaciones
d'inmigrantes irregulares, y que dende güei van operar patrulles mistes
d'España y Mauritania pa xixilar el tráficu de
cayucos,
embarcaciones coles que los inmigrantes intenten llegar a Canaries dende
Mauritania, país
que convirtióse nel principal puntu de salida de miles de persones de
distintes países del África subsahariana.



Pela so parte'l gobiernu canariu critica per boca del so portavoz de Miguel
Becerra l'actitú del gobiernu central nesta crisis. Pal executivu
canariu'l gobiernu español ta amosando una gran dexadez nesti tema,
acusándolu de preocupase más de lo que puede pasar colos
intereses empresariales de Repsol en Bolivia que de lo que ta pasando nes
costes de Canaries, onde "el problema ye de vides humanes" .