El Gobiernu esixe un estudiu d’impautu ambiental a l’ampliación del puertu d’As Figueiras

|

El proyeutu de reordenación de dársenes del puertu d’As Figueiras va necesitar un estudiu d’impautu ambiental. El Gobiernu atendió les alegaciones de la Coordinadora Ecoloxista y d’otros organismos, como la Xunta de Galicia.
 
D’esta forma, el Gobiernu del país esixe un estudiu d’impautu ambiental de les obres previstes d’esti puertu bañáu pola ría del Eo, asina como la presentación d’otres alternatives más afayaices pa facer la reordenación del cai. El puntu más conflictivu del proyeutu y el que más refugu tuvo por partes de dellos coleutivos, ente los que s’alcontraba la Coordinadora Ecoloxista d'Asturies, ye la sustitución d’una dársena flotante por una escollera de 6 metros d’altor y 180 de llargor, lo que diba tener un efeutu importante na ría, tal como asocedió cola que se llevantó na oriella gallega, en Ribadeo.
 
“La propuesta fecha pol Principáu carecía del mínimu rigor nos estudios d’actuaciones na ría porque tamos falando d’una actuación nun espaciu natural perdelicáu. Escandaliza observar como la memoria pasa de llargo sobre l’efeutu na dinámica de les agües de la ría y el consiguiente movimientu nos depósitos d’arena, cuestión fundamental porque tamos actuando sobre una ría y tol ecosistema que se fundamenta nella, non sobre un campu montés”, resalten los ecoloxistes, que recuerden que’l puertu previstu ta dientro la Reserva Natural Parcial d’alcuerdu al  Plan d’Ordenación de los Recursos Naturales d’Asturies (PORNA), ente otres figures proteicionistes, al considerar la ría como una zona d’interés alta merecedora de proteición.

Contador Estadistiques