El Gobiernu devuelve factures por valor de 200.000 euros d’encargos del gabinete de Migoya

La viceconseyería d’Infraestructures anunció que devolvió factures publicitaries por un importe superior a los 200.000 euros “ensin soporte alministrativu y presupuestariu”. Éstes tienen orixe nel gabinete de la ex conseyera Ana Rosa Migoya.
 
Según se señala dende l’Executivu, trátase de reclamaciones económiques que'l Gobiernu vien recibiendo dende hai un tiempu y que, pola información facilitada poles empreses afectaes, tán rellacionaes con inserciones publicitaries incluyíes nuna campaña planiada por cuenta de les obres del Plan A. Al paecer, estes inserciones ordenóles un cargu de llibre designación qu'emprestaba los sos servicios nel gabinete de la ex conseyera Ana Rosa Migoya. "Una vez analizada la documentación recibida poles empreses reclamantes y, tres comprobar la documentación de los funcionarios responsables de los servicios supuestamente encargaos de tramitar estos gastos, resultó que nin el xefe de serviciu nin el restu de los funcionarios ascritos tramitaren contratu dalgún previstu nos espedientes del denomináu Plan Asturies o 'Plan A'", informó Infraestructures.
 
Sí se constató, sicasí, qu'en tolos casos revisaos contratárense valles publicitaries de madera pa les obres, tal como taba contempláu nos pliegos de condiciones. Ante esta situación, esta viceconseyería decidió devolver les factures a les empreses remitentes por entender que los encargos foron "baxo la responsabilidá personal de los que los fixeron, pues nun tienen cobertoria alministrativa o presupuestaria dalguna".