El Gobiernu defende la llegalidá de les deducciones venceyaes a les ayudes COVID-19

L'Executivu estatal anunció un recursu d'inconstitucionalidá contra l'artículu de la Llei de Presupuestos Xenerales que les traten.

El Gobierno d'Asturies defende la llegalidá de les deducciones asociaes a les ayudes COVID-19 autonómiques. Entiende que s'encuadra dientro de lo previsto nel artículu 46.1.c) de la Llei 22/2009 –pola que se regula'l sistema de financiamientu autonómicu de les comunidaes de réxime común y se modifiquen determinaes normes tributaries– y nun se venceya al desenvolvimientu d'actividaes económiques, como argumenta l'Alministración central.

"Ello ye que la deducción diríxese precisamente a contribuyentes que nun pudieron desenvolver actividaes económiques de resultes de les llimitaciones impuestes pola pandemia del coronavirus. En definitiva, nun se trata de fomentar o favorecer el desenvolvimientu d'actividaes económiques, sinón de minimizar la perda d'ingresos de ciudadanos especialmente afeutaos pola crisis", espliquen dende'l Gobiernu asturianu.

Postura de Madrid

El Conseyu de Ministros aprobó ayeri esti recursu al Tribunal Constitucional al considerar "que les deducciones por algamar subvenciones o ayudes p'amenorgar l'impautu de la COVID-19 sobre sectores especialmente afeutaos esceden les competencies normatives autonómiques, yá que s'escluyen les qu'afeuten al desarrollu d'actividaes económiques". Impugna en concreto l'artículu 39.8 de la Llei de Presupuestos Xenerales pal 2021 llueu de nun haber alcuerdu na Comisión Bilateral y tener un dictame favoratible del Conseyu d'Estáu.

Na imaxe, un momentu del Conseyu de Gobiernu del vienres pasáu na sede de Presidencia. Semeya obra d'Armando Álvarez.