El Gobiernu d'Asturies diz que l'aumentu en gastos de personal débese a una "reestructuración de funciones"

La viceconseyera del Área Institucional y de Servicios Xenerales dependiente de Presidencia del Principáu, Carmen Sánchez, dixo güei que l'aumentu rexistráu en gastos de personal nel proyectu de Presupuestu pal 2008 pal so departamentu débese a la "reestructuración" realizada nel senu del Gobiernu asturianu. Asina respondía a les crítiques d'Izquierda Xunida y del PP, qu'acusaron a los responsables de Presidencia d'aumentar el númberu d'asesores del Presidente del Principáu "ensin xustificación dalguna" y refugaron el calificativu de "austeru" sobre la política de personal del gobiernu.

Les diferencies quedaron espeyaes na Comisión d'Economía y Asuntos Europeos de la Xunta Xeneral del Principáu d'Asturies, onde intervinieron pa esplicar el proyectu los responsables de Presidencia.

Tres ser interrogada pol incrementu de dalgo más d'un millón d'euros en materia de gastos de personal, lo que supón una subida del 20% pa Noemí Marín, d'IX, Sánchez dixo que en presidencia s'asumieron nesta llexislatura funciones que tan enantes repartíes n'otres conseyeríes, polo que consideró "llóxicu" y un exemplu de la "austeridá" del Gobiernu esa nueva infraestuctura.

Amás, dixo qu'en llinies xenerales, el númberu d'asesores nel conxuntu del Gobiernu asturianu baxa pal añu que vien.

Amás, comentó qu'Asturies ye la comunidá autónoma con salarios "más baxos" de los políticos y concretamente el so presidente y insistió en que los presupuestos pal 2008 caltienen la mesma estructura presupuestaria que n'años anteriores. A gastos de personal tán destinaos 2.291.635 euros, de los que 945.220 euros, correspuenden a personal eventual de gabinete.

Les esplicaciones de Sánchez, que tuvo aocmpañada pol viceconseyeru de Comunicación, Víctor Suárez, nun convencieron a Noemí Martín, que refugó dafechu'l conceutu de "austeridá" señaláu polos representantes gubernamentales.

Martín tamién negó que se produxera una reordenación de funciones, porque, según dixo, eses funciones ya yeren realizaes por Presidencia, anque fuera de manera "compartida" con otres conseyeríes.

Dende'l so puntu de vista, l'aumentu de "asesores del presidente" nun ye xustificable y dixo que 25 asesores resulten "escesivos".

Pela so parte, la vocera del PP, Inmaculada González, que renució al so turnu d'entrugues, dixo nel so turnu final que nun-y sorprenden les "xustificaciones" del Gobiernu. "Estos presupuestos nun son austeros", finó.

Per últimu, Álvaro Álvarez, del PSOE, defendió que sí hai austeridá nel Gobiernu socialsita nesi aspeutu y dixo que los sos númberos "resisten cualquier comparanza" con otres comunidaes autónomes. Amás, comentó que los llamaos asesores ocupen abondes funciones que nun son sólo l'asesoramientu al presidente.