El Gobiernu d’Asturies autoriza l’ampliación del vertederu de residuos non peligrosos de Coxersa

Esta ampliación implica actuar sobre una superficie de 43,9 hectárees del vertederu actual p’aumentar la so cota hasta los 230 metros y la so capacidá en 21,3 millones de metros cúbicos.

La Comisión d’Asuntos Medioambientales (CAMA) informó favorablemente l’espediente de cambéu de l’autorización ambiental integrada (AAI) pa l’ampliación del vertederu de residuos non peligrosos de Coxersa, como midida provisional hasta la entrada en funcionamientu de la planta de tratamientu de la fracción mecida de los residuos municipales. La planta futura, que va empezar a funcionar nel 2023, va suponer una inversión de 58 millones y el so proyectu atópase en trámite d’información pública dende’l llunes pasáu.

L’espediente informóse na xunta que tuvo güei la CAMA, presidida pola directora xeneral de Calidá Ambiental y Cambéu Climáticu, Paz Orviz, y a la que tamién asistieron los directores xenerales d’Ordenación del Territoriu y Urbanismu, Alfonso Toribio; Alministración Local, Manuel Calvo; Mediu Natural, David Villar, y Movilidá, Jorge García, amás de la directora xeneral d’Industria, Rosana Prada. Amás, participaron, ente otros, el comisariu d’agua de la Confederación Hidrográfica del Cantábricu, Jesús María Garitaonandia, y el director d’Industria de la Delegación del Gobiernu, Gonzalo Mesa..

Otra manera, la CAMA informó favorablemente l’espediente d’evaluación d’impactu ambiental del proyectu de construcción d’una planta nes instalaciones de la empresa Ence, en Navia, pa una llinia productiva nueva de pastia Dissolving, una fibra testil que se va usar pa producir rayón o viscosa d’usos médicos hixénicos. La planta, con una superficie total d’alredor de les 7 hectárees, va dexar fabricar 200.000 tonelaes anuales d’esti productu.

Amás, la comisión dio lluz verde al espediente d’evaluación d’impactu ambiental de l’ampliación de la planta de fusión, colada y laminación de cinc que la empresa Asturiana de Laminados tien nel polígonu de Vil.layana, en L.lena. Esti proyectu implica la creación de dos llinies nueves pa prepatináu y recubrimientu de bobines nuna nave de 208 metros de llargu y 30 d’anchu..

La resolución d’estos procedimientos ambientales supón una meyora pa los proyectos d’inversión de dambes empreses..

Finalmente, la comisión informó la memoria ambiental de la evaluación ambiental estratéxica del plan xeneral d’ordenación y el catálogu urbanísticu del conceyu de Noreña